Naxçıvan şəhərində Beynəlxalq Miqrasiya Təşkilatının (BMqT) təşkilatçılığı ilə "Azərbaycanda kəhriz su sistemlərinin bərpası: təcrübələr, nailiyyətlər və perspektivlər" mövzusunda seminar keçirilib. Trend in Naxçıvan Bürosu xəbər verir ki, tədbirdə bir sıra əlaqədar təşkilatların nümayəndələri iştirak edib.
İsveçrə Əməkdaşlıq Agentliyi Milli proqramının Azərbaycan üzrə rəhbəri Oqtay Gülmalıyev çıxışında keçirilən seminarın kəhriz su sistemlərinin Azərbaycanın başqa bölgələrində də mümkün tətbiqi məsələlərinə təkan verəcəyinə əminliyini bildirib.
Tədbirdə həmçinin Beynəlxalq Miqrasiya Təşkilatının Azərbaycan Nümayəndəliinin rəhbəri Sarat Daş, BMT-nin Naxçıvan Ofisində Kəhrizlərin bərpası layihəsinin koordinatoru Arzu Musayev, ARAN qeyri- hökumət təşkilatının rəhbəri Rauf Əliyev, Naxçıvan MR Kəhrizlər İdarəsinin müdiri Sədi Talıbovun fikir və təklifləri dinlənilib.
Məlumat üçün deyək ki, Naxçıvan Muxtar Respublikasında qeyd olunan su mənbələrinin sayı 400-dən artıqdır. Ölkə miqyasında isə kəhrizlər əsasən Kür çayından cənub və qərb istiqamətdəki 20 rayonda geniş yayılıb.