Naxçıvan MR-də Suvarma Paylayıcı Sistem və onun İdarəolunmasının Təkmilləşdirilməsi Layihəsinin (SPSİTL) növbəti mərhələsi həyata keçirilir. Trend in Naxçıvan Bürosu xəbər verir ki, artıq regionda layihə çərçivəsində Regional Təlimçinin (RT) seçimi ilə əlaqədar tender elan edilib.
Azərbaycan Meliorsiya və Su Təsərrüfatı ASC nəzdində Suvarma- Drenaj İnfrastrukturunun Bərpası və Tamamlanması Layihəsinin həyata keçirilməsi üzrə işçi qrupu SPSTL-ni Naxçıvan MR də Babək və Şərur rayonları da daxil olmaqla ölkə üzrə 11 rayonda aparır. Məqsəd eyni sayda layihə rayonlarında təxminən 56 min hektar suvarılan torpaq sahəsində suvarma və drenaj sistemlərini müasir tələblərə uyğun bərpa etmək, onları tam işlək vəziyyətə gətirmək, bu sahələrin su təminatını yüksəltmək, kənd təsərrüfatı bitkilərinin məhsuldarlığının artımına və torpaqların meliorativ vəziyyətinin yaxşılaşdırılmasına nail olmaqdır.
Layihənin əsas tapşırıqlarından biri kimi layihə rayonlarında Sudan İstifadəedənlər Birliklərinin (SİB) yaradılmasıdır ki, bu istiqamətdə ilkin olaraq bir sıra tədbirlər baş tutub. Belə ki, ötən müddət ərzində SİB-lərin formalaşdırılması üçün Naxçıvan MR Meliorsiya və Su Təsərrüfatı Agentliyinin Mərkəzi aparatında və yerlərdəki təşkilatlarında "Dəstək qrupları" yaradılaraq fəaliyyəti təmin edilib.
Qeyd edək ki, beynəlxalq təcrübəyə əsasən həyata keçirilən SPSİTL rəsmi olaraq fəaliyyətə 2003-gü ilin dekabr ayından başlayıb. Layihə 2009-cu ildə başa çatacaq.