...

Ədalət Partiyasının sədri: "Azadlıq" blokuna daxil olan partiyalar özlərini real güc sayaraq heç kəslə hesablaşmırlar"

Siyasət Materials 28 Dekabr 2006 17:28

Trend-i buradan izləyin

"Müxalifət partiyalarının toplantısı barədə mənim xəbərim yoxdur və bizim partiya dəvət olunmayıb". Bu fikirləri Trend ə açıqlamasında Ədalət Partiyasının sədri, millət vəkili İlyas İsmayılov bildirib.

Qeyd edək ki, müxalifət partiyalarının iştirakı ilə bu gün - dekabrın 28-də Azərbaycan Demokrat Partiyasının (ADP) qərargahında söz və mətbuat azadlığının müdafiəsi üzrə Koordinasiya Şurasının toplantısı keçirilib. Ədalət Partiyasının sədri bu toplantı barədə ona heç bir məlumat verilmədiyini deyib: "Mən dəvət olunduğum yerə ya özüm gedirəm, ya da nümayəndəmizi göndərirəm. Amma bu görüşə dəvət olunmamışam. Çağırmayıblarsa, özləri bilərlər"-deyə İ.İsmayılov qeyd edib.

O əlavə edib ki, jurnalistlərə qarşı zorakılığın əleyhinədir. Onun fikrincə, belə hallar Azərbaycana beynəlxalq aləmdə başucalığı gətirmir. İ.İsmayılov eyni zamanda müxalifət partiyalarının əməkdaşlıq məsələlərinə də toxunub. Onun sözlərinə görə, bəzi müxalifət qüvvələri, xüsusən də "Azadlıq" blokuna daxil olan partiyalar özlərini başqalarından fərqləndirərək əsil güc hesab edirlər: "Bu partiyalar öz aləmlərində özlərini ən real qüvvə sayırlar və heç kəslə hesablaşmırlar. Allah niyyətlərini xeyir etsin. Amma biz bütün partiyalarla vaxtilə əmkdaşlıq etmişik. Hesab edirəm ki, əməkdaşlıq birtərəfli şəkildə olmamalıdır. Partiyaların ümumi ortaq mövqeləri olmur. Partiyalar konkret hadisələrə dair konkret münasibətlərini bildirilməlidir. Hər bir partiya hadisələrə öz maraqlarına uyğun şəkildə münasibət göstərir. Bu səbəbdən də fikir müxtəlifliyi yaranır. Amma hesab edirəm ki, bunu normal qarşılamaq lazımdır"-deyə Ədalət Partiyasının sədri vurğulayıb.

Xəbər lenti

Xəbər lenti