"Yeni Siyasət" (YeS) blokunda fikir ayrılığı və ziddiyyət yoxdur. Bu barədə Trend ə açıqlamasında "YeS"in həmtəsisçisi Eldar Namazov bildirib. Onun sözlərinə görə, bloka daxil olan şəxslər eyni mövqedən çıxış edirlər. E.Namazov qeyd edib ki, "YeS"in gələcək fəaliyyəti ilə bağlı İşçi qrupun hazırladığı təkliflərə etiraz edən olmayıb.
"Mən onun tərafdarıyam ki, bir qədər də düşünüb, çox ciddi götür-qoy edib düzgün qərar qəbul etmək lazımdır. Azərbaycan siyasətində nəyisə bəyan edib görüntü yaratmaq ənənəsi var. Bu həmişə pis nəticə verir", - deyə E.Namazov vurğulayıb.
O əlavə edib ki, blokun həmtəsisçiləri yaxın günlərdə qərarlarını rəsmən elan edəcəklər. Lakin bunun dəqiq tarixi məlum deyil: "YeS"in gələcək fəaliyyəti ilə bağlı qərarın verilməsinin geçikməsi blokun daxilindəki vəziyyətlə bağlı deyil. Bu ölkədə yaranmış durumla əlaqədardır. Biz bir çox məsələlərin aydınlaşmasını gözləyirik."
Xatırladaq ki, "YeS" bloku 2005-ci ilin parlament seçkiləri ərəfəsində bir qrup siyasətçi, ictimai xadim və bir neçə partiyanın iştirakı ilə seçki bloku kimi yaradılıb. Seçkilər başa çatandan sonra partiyaların bir qrupu bloku tərk edib. Həmtəsisçilər "YeS"in siyasi bloka çevriləcəyini bəyan ediblər. Lakin bu hələ də baş tutmayıb.
Blok Milli Məclisdə iki deputatla təmsil olunur.