"Müxalifət partiyalarının ayrı-ayrılıqda etiraz aksiyaları keçirməsinin heç faydası olmayacaq". Bu fikirləri Trend ə açıqlamasında Vətəndaş Həmrəyliyi Partiyasının (VHP) sədri Sabir Rüstəmxanlı bildirib.
Qeyd edək ki, müxalifəti təmsil edən "Azadlıq" bloku yanvarın 26-da, Müsavat Partiyası isə yanvarın 28-də qiymət artımına etiraz olaraq aksiya keçirəcəklər. VHP sədri bildirib ki, onun partiyası bu aksiyalara qoşulmayacaq. Lakin fərdi şəkildə VHP üzvləri həmin tədbirlərdə iştirak edə bilərlər. S.Rüstəmxanlı hesab edir ki, ölkədə qiymətlərin bahalaşmasına etiraz olaraq bütün müxalifət birgə müqavimət formalaşdırsaydı, bu, vəziyyəti dəyişdirə bilərdi. Lakin indiki halda, pərakəndə şəkildə müxaifət heç nəyə nail olmayacaq.
"Qiymət artımı baş verən kimi müxalifət partiyalarının hamısı bir araya gəlib hamının adından birgə bəyanat verməli, birlikdə böyük nümayişlər keçirilməli idi. Amma müxalifət bu məsələdə vahid bir fikrə gələ bilmədi, hərə tək-tək özü aksiyalar keçirir. Bunun da heç bir xeyri olmayacaq. İndiki aksiyaları digər partiyalar özləri təşkil ediblər və biz ora qoşulmağa ehtiyac görmürük"-deyə S.Rüstəmxanlı vurğulayıb.
Xatırladaq ki, müxalifətyönlü VHP S.Rüstəmxanlının rəhbərliyi altında 1992-ci il 26 sentyabrda bir qrup ziyalı tərəfindən yaradılıb. Partiyanın sədri millət vəkili, xalq şairi S.Rüstəmxanlı 1991-95-ci illərdə mətbuat və informasiya naziri, 2003-cü il prezident seçkilərində prezidentliyə namizəd olub.