Ümid Partiyasının sədri: "Siyasi partiyaların namizədi olmaqdansa, xalqın müxalif hissəsinin namizədi olmaq daha uğurludur"

Azərbaycan, Bakı /müxbir Trend S.İlhamqızı/ Ümid Partiyası hər hansı siyasi blokda, ittifaqlarda təmsil olunmaq niyyətində deyil. Bu barədə partiyanın sədri, millət vəkili İqbal Ağazadə jurnalistlərə açıqlama verib.

İ.Ağazadə qeyd edib ki, bloklaşma Azərbaycan cəmiyyəti üçün perspektivli deyil: "Blokların yaradılması, fəaliyyəti indiyə qədər özünü doğrultmadığına görə cəmiyyət tərəfindən ciddi qəbul edilmir. Hər bir siyasi blokun formalaşmasından sonra cəmiyyətdə onların ünvanına ittihamlar yaranır. Bu isə həmin qüvvələrin insanlarla münasibətlərində çatların ortaya çıxmasına rəvac verir", deyə İ.Ağazadə qeyd edib.

İ.Ağazadə həmçinin qeyd edib ki, müxalifətin yeni yaradılacaq güc mərkəzinin 2008-ci ilin prezident seçkilərinə vahid namizədlə çıxış etməsini məqbul saymır: "Müxalifətin vahid namizədi ilə bağlı Ümid Partiyasının strategiyası budur ki, siyasi partiyaların iddialı namizədi olmaqdansa, 70 faizlik xalqın müxalif hissəsinin namizədi olmaq daha uğurludur".