Azərbaycan, Bakı, 29 fevral / Trend , müxbir K.Zərbalıyeva/ Keçmiş OMON-çu məhkəmənin qərarı ilə azadlığa buraxılıb. Nizami rayon məhkəməsinin 24 fevral tarixli qərarı ilə 8 il azadlıqdan məhrum edilmiş Səxavət Humbətov vaxtından əvvəl azad olunub.
Bu haqda cümə günü Trend ə Hümbətovun anası Adilə Hümbətova məlumat verib.
1 saylı cəzaçəkmə müəssisəsində cəza çəkən Hümbətov 1995-ci ilin mart hadisələrində iştirak etdiyinə görə, həmin il məhkəmənin hökmü ilə 11 il iş alıb. Apellyasiya Məhkəməsi onun cəzasını 8 ilə endirib.
2002-ci ildə Hümbətov Ali Sovetin sabiq sədr müavini Afiəddin Cəlilovun qətli barədə xəbər verməməkdə təqsirləndirilərək daha 7 il cəza alıb.
Hümbətovun cəzasının başa catmasına 2 il 1 ay vaxt qalmışdı.
Onun səhhətindəki problemləri nəzərə alaraq, vaxtından əvvəl azad olunması üçün məhkəməyə müraciət olunub.
Hümbətovun adı siyasi hüquq müdafiəçilərinin hazırladığı siyasi məhbus siyahılarına daxil edilib.
Ədliyyə Nazirliyinin Penitensiar Xidmətindən Trend ə bildirilib ki, "Yeni Fikir" Gənclər Təşkilatının sədr müavini Ramin Tağıyev də məhkəmənin qərarı ilə vaxtından əvvəl azadlığa buraxılıb. Tağiyev 1 saylı cəzaçəkmə müəssisəsində cəza çəkirdi.