Azərbaycan, Bakı, 05 mart / Trend , müxbir K.Zərbalıyeva/ Cəzasının müəyyən hissəsini çəkmiş məhkumların vaxtından əvvəl azadlığa buraxılmasına prokurorluq orqanlarında əngəllər yaradılır. Bu barədə çərşənbə günü ədliyyə naziri yanında Məhkumların islah edilməsi və cəzanın icrasını həyata keçirən təşkilatların fəaliyyətinə ictimai nəzarəti təmin edən İctimai Komitənin üzvlərinin Penitensiar Xidmətin rəisi, ədliyyə nazirinin müavini Nazim Ələkbərovla görüşündə hüquq müdafiəçisi Çingiz Qənizadə məlumat verib.
İctimai Komitənin koordinatoru Sahib Məmmədov Trend ə bildirib ki, Qənizadə cəzaçəkmə müəssisələrində cəzalarının hissəsini çəkən kifayət qədər məhkumun olduğunu, onların cəzalarının 2/3, 3/4 və 1/3 hissəsini çəkəndən sonra vaxtından əvvəl yerli rayon məhkəmələri tərəfindən azadlığa buraxılmaq üçün müraciətlərinə mənfi cavab verildiyini diqqətə çatdırıb.
Qənizadə məhkumların vaxtından əvvəl azadlığa buraxılmasına prokurorluq orqanlarının razılıq vermədiyini deyib.
Komitə üzvləri məhkumların təqaüdlərinin alınması ilə bağlı problemlərin də olduğunu diqqətə çatdırıblar.
Məmmədov bildirib ki, məhkumlar arasında şəxsiyyət vəsiqəsi olmayan kifayət qədər məhkum var və onlar bu səbəbdən təqaüd ala bilmirlər. "Məhkumların bir qismi təqaüd yaşına çatsa da, onların şəxsiyyət vəsiqəsi olmadığından təqaüd ala bilmir. Bu isə onların sosial hüquqlarının pozulması deməkdir" - deyə koordinator vurğulayıb.
Məmmədov bu problemin həlli üçün Sosial Müdafiə Fonduna və Daxili İşlər Nazirliyinə müraciət ediləcəyini deyib.
Ədliyyə nazirinin müavini ilə görüşdə hüquq müdafiəçisi Eldar Zeynalov Qobustan qapalı həbsxanası ilə bağlı şikayətlərin qeydə alınmaması və araşdırılmamasından narazılıq bildirib.
Komitə üzvləri gələn həftə Qobustan həbsxanasında monitorinq keçirməyi qərara alıblar.
Penitensiar Xidmətdən Trend ə bildirilib ki, görüşdə İctimai Komitənin cəzaçəkmə müəssisələrində keçirdiyi monitorinqlərin nəticələri müzakirə olunub. Məhkumların təqaüd almaları ilə bağlı bəzi problemlərin olduğu qeyd olunub. Komitə üzvlərinə Xidmətdə Məhkumların Soaial Müdafiəsi şöbəsinin yaradıldığı barədə məlumat verilib və bildirilib ki, şöbə bu problemlərin həlli istiqamətində müəyyən tədbirlər həyata keçirir.
