Azərbaycan, Bakı, 25 iyun / Trend , müxbir K.Zərbəliyeva/ Azərbaycan jurnalistləri Avropa İnsan Haqları Məhkəməsinə daha bir şikayət göndəriblər.
Hüquq Maarifçiliyi Cəmiyyətinin prezidenti İntiqam Əliyev bildirib ki, Jurnalistlər Elşad Məmmədov ("Yeni Müsavat"), Elşən Məmmədəliyev ("Gündəlik Azərbaycan"), Fikrət Hüseynov ("Azadlıq" qəzeti), Çingiz Sultanov ("Realnıy Azerbaydjan"), Hacı Zeynalov (Ayna-Zerkalo"), Vazeh Mehdiyev ("Bakı-Xəbər"), Ramiz Nəcəfli (müstəqil jurnalist), Səbuhi Nəsibovun ("Zerkalo") İnsan hüquqlarının və əsas azadlıqlarının müdafiəsi haqqında Konvensiya ilə təminat verilən məhkəmənin açıqlığı (6-cı), məlumat almaq və yaymaq (10-cu) və ayrı-seçkiliyə məruz qalmamaq (14-cü) hüquqlarının pozuntusundan şikayət veriblər.Ötən il sabiq səhiyyə naziri Əli İnsanovun və başqalarının cinayət işi üzrə məhkəmə proseslərinə buraxılmayan jurnalistlərin Ağır Cinayətlərə Dair İşlər üzrə Məhkəmə, Ədliyyə Nazirliyi Məhkəmə Nəzarətçiləri və İcraçıları İdarəsi və həmin prosesi aparan hakimlərə qarşı qaldırdıqları iddialar Azərbaycan məhkəmələri tərəfindən rədd edilib.
Avropa Məhkəməsində "Müxalifət" qəztinin baş redaktoru Rövşən Kəbirli və əməkdaşı Yaşar Ağazadənin iki şikayəti icraata qəbul edilib.
Onlar da Konvensiyanın məhkəmənin açıqlığı (6-cı), məlumat almaq və yaymaq (10-cu) hüquqlarının pozuntusundan şikayət veriblər.
Azərbaycanda üç jurnalist məhkum olunub. "Gündəlik Azərbaycan" qəzetinin baş redaktoru Eynulla Fətullayev 8 il 6 ay, "Azadlıq" qəzetinin baş redaktoru Qənimət Zahid 4, həmin qəzetin əməkdaşı Mirzə Sakit isə 3 il azadlıqdan məhrum ediliblər.
Müəlliflə əlaqə saxlamaq üçün elektron ünvan - [email protected]