Azərbaycan, Bakı, 22 iyul / Trend , müxbir K.Zərbalıyeva/ Azərbaycanda qanunsuz silahlı birləşmə yaradan "Əl-Qaidə" və "Əl-Cihad" beynəlxalq terrorçu təşkilatlarla əlaqəli olan ərəb mənşəli, Əbu Cəfər ləqəbli Naif Əbdülkərim Əl-Bədəvi və onun rəhbərlik etdiyi 17 nəfərlik dəstə üzvlərinə prokuror iş istəyib.
Məhkəmədə cinayət işi üzrə "Əbu Cəfər" və qrupun digər üzvləri - Mirzə Babayev, Qədir Hacıyev, Vüqar Əliyev, Emin Cami, Loğman Muradov, Habil Məsməliyev və Pərviz Kərimov, Vidadi Kərimov, Adil Gərayxanov, Vitali Ağaməmmədov, Asəf Həzərov, Daniyal Abuyev, Rafael Rəhimov və "Əbdul Malik" və "Hacı" ləqəbləri ilə tanınan Elçin Əlimirzəyev və digərlərinin işinə baxılıb.
Məhkəmədən Trend -a verilən məlumata görə, prokuror dəstə başçısı Əl-Bədəviyə 15, Elçin Əlimirzəyevə 13, digər dəstə üzvlərinə isə 4 ildən 12 ilədək azadlıqdan məhrumetmə cəzasının verilməsini xahiş edib.
İstintaqı Milli Təhlükəsizlik Nazirliyinin İstintaq Baş İdarəsi tərəfindən aparılan dəstə üzvləri Cinayət Məcəlləsinin qanunvericiliklə nəzərdə tutulmayan silahlı qrup yaratma (279.2), hakimiyyət nümayəndəsinə qarşı müqavimət göstərmə və ya zor tətbiqetmə (315.2), qabaqcadan əlbir olan bir qrup şəxs tərəfindən qanunsuz olaraq odlu silah, onun dəstləşdirici hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə (228.2.1) maddələri ilə təqsirləndirilirlər.
Dəstə başçısı ötən il noyabrın 2-3-də MTN-in "Qartal" Xüsusi Təyinatlı Dəstəsi tərəfindən qrupun bir neçə üzvü ilə birlikdə həbs olunub. Həmin qrupun zərərsizləşdirilməsi üzrə hüquq mühafizə orqanları tərəfindən keçirilən birgə tədbirlər zamanı ötən il sentyabrın 26-da qrup üzvlərindən biri - Telman Abdullayev odlu silahdan atəş açaraq iki polis əməkdaşını yaralayıb hadisə yerindən qaçıb.
Proses iyulun 25-də vəkillərin çıxışları ilə davam edəcək.
Müəlliflə əlaqə saxlamaq üçün elektron ünvan - [email protected]
