Azərbaycan, Bakı 28 oktyabr / Trend , müxbir K. Zərbalıyeva/ Füzuli rayonundan məcburi köçkün düşmüş, 1993 - cü ildən Sumqayıt şəhərində məskunlaşmış ailə məhkəmə qərarı ilə məskunlaşdığı mənzildən çıxarılıb.
Oktyabrın 21-də yaşadığı mənzildən çıxarılan Əjdər Süleymanov Trend - a bildirib ki, 1993 - cü ildən 9 nəfərlik ailəsi ilə birgə Novxanı bağlar massivi, 1762 saylı bağ sahəsində məskunlaşıb.
Bağ sahəsinin istifadəçisi Murad Mahmudov mülkiyyət hüququ əldə etdikdən sonra, 2005-ci ildə onların evdən çıxarılması barədə Sumqayıt şəhər Məhkəməsinə müraciət edib.
Sumqayıt şəhər Məhkəməsinin hakimi Qafil Baxşiyev cavabdehin iştirakı olmadan iddiaya baxıb və iddianın təmin olunması barədə qətnamə qəbul edib.
Sumqayıt şəhər Məhkəməsinin 21 dekabr 2005 - ci il tarixli qətnaməsi ilə məcburi köçkün ailəsinin bağ sahəsindən çıxarılması və iddiaçıya 633 milyon manat (AZN) pul ödənməsi barədə qətnamə çıxarıb.
Sumqayıt Appelyasiya Məhkəməsi qətnamənin ziyanın ödənilməsi barədə hissəsini ləğv edib, yaşayış sahəsindən köçürülməsi barədə hissəsini qüvvədə saxlayıb.
Qərardan verilən kassasiya şikayəti hazırda Ali Məhkəmənin icraatındadır.
Süleymanov hesab edir ki, qətnamə Prezidentin 17 sentyabr 1998 - ci il tarixli 895 saylı Sərəncamı ilə təsdiq edilmiş "Qaçqınların və məcburi köçkünlərin problemlərinin həlli üzrə" Dövlət Proqramınazidd qəbul olunub.
Dövlət Proqramının 16-cı bəndinə əsasən, məcburi köçkünlərin 1992 -1994 - cü illərdə müvəqqəti məskunlaşdıqları mənzillərdən çıxarılmasının qarşısının alınması, həmin ailələrin məskunlaşdıqları evlərə aidiyyəti təşkilatlar tərəfindən ayrı - ayrı vətəndaşlara verilmiş orderlərin hüquqi qüvvəsinin müvəqqəti olaraq dayandırılması 1998 - ci və sonrakı illər üçün nəzərdə tutulub.
Süleymanov bildirir ki, ailəsinin yaşayış yeri ilə təmin olunması məsələsi qətnamədə həll edilməyib.
Nazirlər Kabinetinin qərarı ilə təsdiq edilmiş "Məcburi köçkünlərin başqa yaşayış sahəsinə köçürülməsi Qaydası"nın 5-ci bəndinə əsasən, məcburi köçkün ailələrinin başqa yaşayış sahəsinə köçürülməsi Qaçqınların və Məcburi Köçkünlərin İşləri üzrə Dövlət Komitəsi ilə razılaşdırılır.
Sumqayıt şəhər Məhkəmə İcraçıları Şöbəsinin əməkdaşları oktyabrın 21 - də Sumqayıt şəhər Polis İdarəsi əməkdaşlarının köməyi ilə icranı həyata keçiriblər.
Süleymanov bildirib ki, icra zamanı polis əməkdaşları onun 69 yaşlı xəstə atasını həbs edərək, 8 saat xidməti maşınlarında saxlayıblar.
Şikayətçi məhkəmə qətnaməsinin icrasına möhlət verilməsinə dair ərizə ilə 15 sentyabr 2008 -ci il tarixdə Sumqayıt şəhər Məhkəməsinə müraciət edib.
Sumqayıt şəhər Məhkəmə İcraçıları Şöbəsinin rəisi Sahib Bayramov Trend - a bildirib ki, məhkəmə qərarında həmin ailənin başqa yaşayış yeri ilə təmin olunması və qətnamənin icrası ilə bağlı möhlət verilməsi məsələləri qeyd olunmayıb.
İcranın tam qanuni aparıldığını deyən şöbə rəisi icra prosesində şəhər polis idarəsinin əməkdaşlarının iştirakını təsdiq edib və bildirib ki, bu prosesə polisin, Mənzil İstismar İdarəsi əməkdaşlarının cəlb olunması tam qanunidir.
Şöbə rəisi Süleymanovun atasının qanunsuz olaraq həbsi barədə söylədiklərini təkzib edib.
Şöbə rəisi onu da bildirib ki, Süleymanovun ailəsi məcburi köçkün deyil: "Horadiz qəsəbəsi işğal altında deyil və bu ailə məcburi köçkün deyil. Onlar öz torpaqlarına köçüb orada yaşamalıdırlar",-deyə Bayramov vurğulayıb.
Müəlliflə əlaqə saxlamaq üçün elektron ünvan- [email protected]
