Azərbaycan, Bakı, 07 noyabr / Trend , müxbir A.Hüseynbala / Bakı Şəhər İcra Hakimiyyəti başçısı Hacıbala Abutalıbovun Bayıl qəsəbəsində 128 nəfərin istifadəsində olan qarajların sökülməsi haqqında oktyabrda imzaladığı sərəncam qanunsuzdur, cümə günü Trend Xəbərlər Şirkətinin Mətbuat Mərkəzində keçirilən mətbuat konfransında vəkil Müzəffər Baxışov bildirib.
Trend -ın arayışı: Azərbaycan prezidenti İlham Əliyev 2006-cı ilin dekabr ayında Bayıl qəsəbəsində Hərbi Dəniz Qüvvələrinin bazasında Dövlət Bayrağı Meydanının yaradılması barədə sərəncam verib.
Layihənin texniki rəhbəri "Azərenerji" ASC-nin "Azərenerjitikinti" qurumu tikinti-quraşdırma işlərini yerinə yetirəcək. Layihənin müəllifi ABŞ-ın "Trident Sapport" şirkəti bayrağı hazırlayacaq və nəzərdə tutulan yerdə ucaldacaq.
Bayraq abidəsinin hündürlüyü 150 metr, ümumi çəkisi 220 ton olacaq. Küləyin maksimal sürətində bayrağın əyilmə radiusu 4,2 metrdir. Bayrağın quru vəziyyətdə çəkisi 350 kiloqram olacaq.
"Bakı Şəhər Xalq Deputatları Sovetinin sərəncamı ilə qarajların bir hissəsi özəlləşdirilib, bəziləri isə vətəndaşların qanuni istifadəsindədir: Buna baxmayaraq, oktyabrın 25-də Səbail Rayon İcra Hakimiyyətinin vəzifəli şəxsləri əraziyə gələrək qarajların boşaldılmasını tələb ediblər", - Baxışov deyib.
Onun sözlərinə görə, qarajların sökülməsinin əvəzində sahiblərinə heç bir kompensasiya ödənilməməsi də qanunsuzluqdur. "Biz problemin qanuni yolla həlli üçün Səbail Rayon Məhkəməsinə iddia ərizəsi ilə müraciət etmişik. Düşünürəm ki, Bakı Şəhər İcra Hakimiyyəti rəhbərinin sərəncamı tamamilə absurd bir sənəddir", - vəkil vurğulayıb.
Məsələ ilə bağlı Bakı Şəhər İcra Hakimiyyətindən mövqe öyrənmək mümkün olmayıb.
Məqalə müəllifi ilə əlaqə ünvanı: [email protected]
