Azərbaycan, Bakı, 02 sentyabr / Trend , müxbir K.Zərbalıyeva /
Azərbaycan Ədliyyə Nazirliyinə qarşı qeyri-hökumət təşkilatının iddiası təmin olunmayıb.
Trend -un məlumatına görə, çərşənbə günü Seçkilərin Monitorinqi və Demokratiyanın Tədrisi Mərkəzinin (SMDTM) Ədliyyə Nazirliyinə qarşı iddiası üzrə məhkəmə qətnaməsi elan olunub.
Mərkəzin qeyri-hökumət təşkilatının dövlət qeydiyyatına alınmasından imtinanın qanunsuz sayılması və birləşmək hüququnun pozulmasına dair qaldırdığı iddia tələbi Yasamal rayon məhkəməsinin qətnaməsi ilə rədd olunub.
SMDTM 26 yanvar 2009-cu ildə sənədləri qeydiyyat üçün Ədliyyə Nazirliyinə göndərib. Ancaq aprelin 29-da Ədliyyə Nazirliyinin Qeydiyyat və Notariat Baş İdərəsi sənədləri geri qaytarıb. Nazirliyin məktubunda SMDTM-in təqdim etdiyi sənədlər arasında qurumun yaradılması və Nizamnaməsinin təsdiq edilməsi haqqında qərarın təqdim olunmadığı və qurumun nizamnaməsində "Qeyri-hökumət təşkilatları (ictimai birliklər və fondlar) haqqında" qanunun adının düzgün qeyd olunmaması göstərilib.
SMDTM-in təsisçiləri Ədliyyə Nazirliyinin hərəkətini hüquqazidd davranış kimi qiymətləndirərək, nazirliyə qarşı Yasamal rayon məhkəməsinə iddia ilə müraciət edib.
SMDTM təsisçisi Bəşir Süleymanlı Ədliyyə Nazırliyinin müvafiq qərarını Konstitusiyanın 58-ci maddəsinin (birləşmək hüququ) və İnsan hüqüqlarının və əsas insan azadlıqlarının müdafiəsi haqqında Konvensiyanın 11-ci maddəsinin (yığıncaqlar və birləşmək azadlığı) pozuntusu kimi qiymətləndirib.
Süleymanlı Trend -a bildirib ki, məhkəmənin qətnaməsindən Bakı Apellyasiya Məhkəməsinə şikayət veriləcək.
Məqalə müəllifi ilə əlaqə unvanı: [email protected]