Azərbaycan, Bakı, 3 noyabr / Trend , muxbir H.Bağırov/
Ağır cinayətlər törətməkdə ittiham olunan Rusiya vətəndaşı Namiq Qəzənfər oğlu Mehrəliyevin məhkəməsi başlayıb.
Mehrəliyev Rusiyada Ramiz Verdiyevin qətlində günahlandırılır. İttihama görə, Mehrəliyev Rusiyanın Vladivostok şəhərində birgə kommersiya fəaliyyəti ilə məşğul olduğu Elnur Zeynalovun qətlinin Ramiz Verdiyev tərəfindən təşkil edildiyini güman edib.
Bu məqsədlə tanışları Anar Hacıyev, Əziz Hacıyev, Elmar Həsənovla birlikdə Verdiyevin öldürülməsini planlaşdırıb.
Ötən il yanvarın 11-də Ramiz Verdiyev sürücüsü Sahib Ələsgərov və mühafizəçisi Yuriy Lapin ilə birlikdə "Tural" kafesindən çıxarkən dəstə üzvləri onlara odlu silahdan atəş açıb.
Verdiyev hadisə yerində ölüb, Ələsgərov və Lapin xəsarət alıb.
Cinayətin digər iştirakçıları Anar Hacıyev, Əziz Hacıyev, Elmar Həsənov isə bir müddət öncə Primorsk diyar məhkəməsi tərəfindən cəzalandırılıblar.
Prosesə sədrlik edən hakim Rasim Sadıqov bildirib ki, həmin cinayət işinin Azərbaycana göndərilməsi barədə Primorsk diyar məhkəməsinə sorğu göndərilib. Hakim həmin sorğunun cavabını alana kimi məhkəmə baxışını təxirə salıb.
Mehrəyev Cinayət Məcəlləsinin qəsdən adamöldürmə (120.2.4, 120.2.11), qəsdən adamöldürməyə cəhd (29,120.2.7, 29,120.2.11), qanusuz silahlı qruplar (bandalar) təşkil etmə, belə qruplara (bandalara) rəhbərlik etmə, sabit silahlı qruplarda (bandalarda) və ya onların törətdikləri basqınlarla iştirak etmə (217.1, 217.2), qanunsuz silah saxlama (228) maddələri ilə təqsirli bilinir.
Məqalə müəllifi ilə əlaqə ünvanı: [email protected]