Azərbaycanda terrorçuluqda ittiham olunan "Meşə qardaşları" adlı silahlı birləşmə üzvlərinin apelyasiya şikayəti təmin edilməyib

Azərbaycan, Bakı, 19 mart / Trend , müxbir H.Bağırov/

Azərbaycanda terrorçuluqda ittiham olunan "Meşə qardaşları" adlı silahlı birləşmə üzvlərinin apelyasiya şikayəti təmin edilməyib.

Trend -un məlumatına görə, bu gün Bakı Apelyasiya Məhkəməsində təqsirləndirilən şəxslərin apelyasiya şikayəti üzrə qərar elan edilib.

Məhkəmə Ağır Cinayətlərə Dair İşlər üzrə Məhkəmənin hökmünü qüvvəsində saxlayıb və təqsirləndirilən şəxslərin apelyasiya şikayətini təmin etməyib.

Ağır Cinayətlərə Dair İşlər üzrə Məhkəmənin hökmü ilə Azərbaycan vətəndaşları Elnur Bəşirov 15, Qüdrət Məlikov 15, Xalid Vəlimətov 14, Ülfət Məlikov 13, Vahid Əsədov 15, Rusiya vətəndaşı Maqomed İsayev 15, Zabit Şıxəliyev 7, Fariz Məmmədov 8, Samir Babayev 8, Anar Vəliyev 8, Rasim İsgəndərov 8, Elşən Allahverdiyev 8, Taleh Məhərrəmov 8, Kamran Bozarki 8, Rafiq Ağacanov 6, Teymur Nərimanov 6, Elxan Osmanov 6, Zaur Cəfərov 6, Azər Baxışov 6 il, Vüsal Orucov 5 il 6 ay, Aleksandr Nuraliyev 5 il 6 ay, Məmməd Məmmədov 5 il 6 ay, Rafiq Rzayev 5 il 6 ay, Sərdar Bünyatov 5 il 6 ay, Türkiyə vətəndaşları Yamin Ali 6 və Özdəmir Ergin isə 2 il müddətinə azadlıqdan məhrum ediliblər.

Dəstə üzvləri Azərbaycanda iğtişaş yaratmaq, dövlət quruluşu əleyhinə fəaliyyət göstərmək istəyiblər. Onlar Bakının Nərimanov rayonunda yerləşən "Əbu Bəkr" məscidində terror aktı törətməkdə də təqsirli bilinirlər.

Təqsirləndirilənlər Cinayət Məcəlləsinin terrorçuluq (214-cü), qəsdən adamöldürmə (120-ci), qanunvericilikdə nəzərdə tutulmayan silahlı birləşmələri və ya qrupları yaratma (279-cu), qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldəetmə, başqasına vermə, satma, saxlama, daşıma və gəzdirmə (228-ci) və digər maddələri ilə ittiham olunublar.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az

Trend-in ən mühüm və maraqlı xəbərlərini "Telegram"da izləyin