Azərbaycan, Bakı, 3 dekabr /Trend, müxbir K.Zərbalıyeva/
Azərbaycanda gələn il dedektiv fəaliyyətinə icazə verəcək qanun qəbul olunacaq.
Hüquq-mühafizə orqanlarından cümə günü Trend-ə bildirib ki, artıq qanun layihəsinin hazırlanması istiqamətində müvafiq qurumların nümayəndələrinin və ekspertlərin iştirakı ilə müzakirələr aparılır. Qanun layihəsi hazırlanarkən beynəlxalq təcrübə öyrənilib və Azərbaycanın əxlaqi-mənəvi dəyərləri, mentaliteti nəzərə alınaraq beynəlxalq təcrübədən istifadə olunub.
Məlumata görə, qanun layihəsinin gələn il Parlamentin müzakirəsinə çıxarılacağı nəzərdə tutulur.
Millət vəkili Çingiz Qənizadə Trend-ə müsahibəsində bu məsələyə olduqca ehtiyatlı yanaşılmasını vacib sayıb.
Millət vəkili bildirib ki, qanun hazırlanarkən icraçı və sifariş edənlərin məsuliyyət məsələsi həll olunarsa, hüquq-mühafizə orqanlarının, hüquqşünasların, peşəkarların iştirakı ilə bu məsələ müzakirə edilə bilər.
Onun sözlərinə görə, bu məsələdə mentalitet, mənəvi dəyərlər mütləq nəzərə alınmalıdır.
Millət vəkilinin fikrincə, hazırkı dövrdə belə bir fəaliyyətə icazə verilməsi sui-istifadə hallarına yol açacaq.
"Bir müqayisə aparmaq istəyirəm. Çox vaxt özəl mühafizə xidmətinin əməkdaşları özlərini səlahiyyətli şəxslər kimi aparırlar. Özlərinə rütbələr verir, silah daşıyırlar, vətəndaşlarla kobud rəftar edirlər. Odur ki, dedektiv fəaliyyəti ilə bağlı qanun qəbul edilərkən bu məsələlər nəzərə alınmalıdır. Gələcəkdə ölkədə ictimai münasibətlərin daha da inkişafı, insanların əxlaqi-mədəni səviyyəsinin yüksəlməsi belə bir xidmətin yaranmasına ehtiyac yarada bilər", - Qənizadə deyib.
Millət vəkilinin sözlərinə görə, Azərbaycan Konstitusiyası ilə şəxsi məlumatların yayılması, foto və video görüntülərin çəkilməsi qadağan olunub.
"Bu baxımdan dedektivlərin bu sahədə fəaliyyəti Konstitusiyaya zidd ola bilər", - Qənizadə deyib.
Vəkil Fuad Ağayev dedektiv fəaliyyəti ilə məşğul olan özəl təşkilatların yaradılmasına ehtiyac olduğunu deyir.
Dünyanın əksər ölkələrində özəl dedektiv qurumlarının fəaliyyətinə icazə verildiyini deyən vəkil hesab edir ki, hər şey qanunun necə hazırlanacağından asılıdır.
Vəkil qeyd edir ki, Azərbaycan qanunvericiliyi özəl dedektivlərin fəaliyyəti üçün ciddi məhdudiyyətlər qoyur.
"Özəl dedektivlər üçün səciyyəvi olan fəaliyyət növləri Azərbaycan Konstitusiyası və qanunlarında əməliyyat-axtarış orqanları üçün səciyyəvi hesab edilir, belə fəaliyyətlə məşğul olmaq yalnız hüquq-mühafizə orqanlarının səlahiyyətinə daxil edilir", - Ağayev bildirib.
Hüquqşünas-ekspert Xanlar Ələkbərov hesab edir ki, hüquq-mühafizə orqanlarına alternativ qurumların yaradılması zəruridir.
"İtkin düşənlərin, cinayət törədən şəxslərin axtarılması, həyat yoldaşlarının izlənməsini istəyən vətəndaşlar dövlət qurumlarının bu məlumatları öyrənməsini istəmirlər. Onlar belə məsələlərdə dedektivlərin köməyindən yararlanmaq istəyirlər", - Ələkbərov deyib.
