Azərbaycan, Bakı, 10 dekabr /Trend, müxbir M.Əliyev/
Azərbaycanda yas və toy mərasimlərinin təşkili qaydalarını əhatə edəcək "Mərasimlər haqqında" qanunun ümumi prinsipləri Milli Məclisin yaz sessiyasına kimi hazır olacaq. Bu barədə Trend-ə cümə günü parlamentin Mədəniyyət komitəsinin sədri Nizami Cəfərov bildirib.
Komitə sədri bildirib ki, qanunla toy və yas mərasimləri zamanı həyata keçirilən tədbirlərin nizama salınması nəzərdə tutulur. Qanunun hazırlanması ideyası bu sahədə boşluq və çatışmazlıqların olması səbəbindən yaranıb.
Hazırda Milli Məclisin Mədəniyyət komitəsi Sosial siyasət komitəsi ilə birgə "Mərasimlər haqqında" və "Memoriallar, ziyarətgahlar, anım yerləri haqqında" ayrıca qanunlar hazırlayır.
"Yas mərasiminin keçirilməsi proses olduğundan, qəbiristanlıqlar isə abidə kimi nəzərdən keçirildiyindən, bu iki məsələni bir qanunda birləşdirmək olmaz", - Cəfərov bildirib.
Qanun yas mərasimi zamanı dəfndən tutmuş ehsan verilməsinədək mövcud olan neqativ halları aradan qaldırmağa yönələcək.
