Azərbaycan, Bakı, 26 mart /Trend, müxbir K.Zərbalıyeva/
Azərbaycan Milli Məclisinin şöbə müdiri BMT-nin İnsan Hüquqları Şurasının (İHŞ) Məsləhətçi Komitəsinə ikinci müddətə üzv təsdiq olunub.
Azərbaycan Respublikasının Cenevrə şəhərində BMT bölməsi və digər beynəlxalq təşkilatlar yanında Daimi Nümayəndəliyindən şənbə günü Trend-ə verilən məlumata görə, BMT İHŞ-nin 16-cı sessiyası çərçivəsində Azərbaycan hökumətinin namizədliyini irəli sürdüyü Milli Məclis Aparatının Dövlət quruculuğu üzrə qanunvericilik şöbəsinin müdiri Lətif Hüseynovun İHŞ-nin Məsləhətçi Komitəsinə üzvlüyü 2-ci müddət üçün təsdiq olunub.
BMT İHŞ-nin Məsləhətçi Komitəsi 2008-ci ildən etibarən fəaliyyət göstərir və ümumilikdə beynəlxalq insan hüquqları sahəsində mütəxəssis qismində fəaliyyət göstərən 18 üzvdən ibarətdir. Azərbaycan tərəfindən irəli sürülmüş namizəd ilk dəfə 2008-ci ildə Məsləhətçi Komitəyə 3 il müddətinə üzv seçilib.
Sözügedən Komitə BMT-nin İnsan Hüquqları Şurasının tədqiqat mərkəzidir və həmin qurumun xahişi əsasında müvafiq hesabat və tədqiqatların hazırlanması istiqamətində fəaliyyət göstərir. Komitə BMT-nin İnsan Hüquqları Şurasına mütəxəssis səviyyəsində müəyyən təklif və məsləhətlərini təqdim edir. Məsləhətçi Komitə ildə 2 dəfə sessiya keçirir.
Azərbaycanın namizədi BMT İHŞ-nin Məsləhətçi Komitəsinin üzvü olaraq digər tədqiqat və hesabatların hazırlanmasında fəal iştirak edib, həmçinin "İtkin düşmüş şəxslər üzrə müsbət təcrübələr" haqqında Komitə tərəfindən hazırlanmış hesabat üzrə məruzəçi təyin olunub.