Azərbaycan, Bakı, 13 sentyabr /Trend, müxbir M.Əliyev/
"Kaspi" Təhsil Mərkəzi uşaqların məktəbəqədər hazırlığı ilə bağlı yeni layihəyə başlayır. Trend-in məlumatına görə, bunu çərşənbə axşamı "Kaspi" Təhsil Mərkəzinin ötən tədris ili üzrə yekun hesabat tədbirində Mərkəzin Təhsil Şurasının sədri Sona Vəliyeva bildirib.
Onun sözlərinə görə, məktəbəqədər hazırlıq proqramı 4, 5, 6 yaşlı uşaqların məktəbə tam hazırlanmasını əhatə edir.
Vəliyeva qeyd edib ki, Təhsil Nazirliyi tərəfindən təsdiq olunmuş proqram uşaqlarda özünəinam, ilkin savad, dünyagörüşü, sosial davranış vərdişlərinin yaradılmasına və inkişaf etdirilməsinə kömək edəcək.
"Hazırlıq kursu 10 ay, həftədə beş gün, hər gün üç saat dərs saatı olmaqla üç növbədə nəzərdə tutulub", - Təhsil Şurasının sədri deyib.
Tədbirdə Təhsil Problemləri İnstitutunun direktor müavini Yəhya Kərimov "Kaspi" Təhsil Mərkəzinin təşkil etdiyi kursların önəmini qeyd edib. Onun sözlərinə görə, hazırda ölkədə uşaqların məktəbəqədər təhsil müəssisələrinə cəlb olunma faizi aşağıdır və Təhsil Mərkəzinin təşkil etdiyi kurslar bu problemin həllinə yardım edə bilər.
Tədbirdə "Kaspi" Təhsil Mərkəzinin direktoru Elnur Əliyev bildirib ki, "Kaspi" Təhsil Mərkəzində ötən il hazırlıq keçmiş abituriyentlərin 93 faizi ali məktəblərə daxil olub.
Əliyev, həmçinin Mərkəz tərəfindən abituriyentlər üçün nəzərdə tutulmuş kimya və ingilis dili fənləri üzrə dərs vəsaiti, Azərbaycan tarixi və ingilis dili üzrə test bankını təqdim edib. "Mərkəz tərəfindən hazırlanan vəsaitlər Tələbə Qəbulu üzrə Dövlət Komissiyasının proqramına tam uyğundur. Yaxın gələcəkdə bu istiqamətdə bir sıra yeni vəsaitlər də işıq üzü görəcək", - Əliyev deyib.
Onun sözlərinə görə, yeni tədris ili üçün "Kaspi" Tədris Mərkəzinin iki mövcud filialı ilə yanaşı, daha üç yeni filialı - Yasamal, Xətai, Əhmədli - fəaliyyətə başlayıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
