Azərbaycan, Bakı, 16 dekabr /Trend, müxbir T.Cəfərov/
2015-ci ilədək İran əhalinin savadlılıq səviyyəsini 100 faizə çatdıracaq. Bunu İran Təhsil Nazirliyinin YUNESKO-nun Bakıda keçirilən iclasında iştirak edən nümayəndəsi xanım Munirə Müvəhhidi cümə günü Trend-ə müsahibəsində bildirib.
"İranda savadlılıq səviyyəsinin inkişaf etdirilməsi istiqamətində çox böyük işlər görülüb və görülür. Belə ki, YUNESKO-nun hesabatına əsasən, İranda 1990-2000- i illər arasında savadlılıq səviyyəsi 86.3 faizdən 93.8 faizə qədər artıb", - Müvəhhidi deyib.
Xanım Müvəhhidinin sözlərinə görə, cari ildə İranın ali lideri Ayətullah Əli Xamneyi göstəriş verib ki, ölkədə savadlılıq səviyyəsi 100 faizə çatdırılmalıdır. Artıq ölkənin 2011-2015-ci illəri əhatə edən beş illik inkişaf planı çərçivəsində bu istiqamətdə tədbirlərin görülməsinə başlanılıb.
Müvəhhidi ölkənin təhsil müəssisələrində qızların təhsil alması üçün İran İslam İnqilabından sonra geniş şərait yaradıldığını deyib.
"1988-ci ildə İranın təhsil sisteminin proqramı hazırlandı. Həmin proqramda qızların təhsili proritet götürüldü və nazirliyə göstəriş verildi ki, qızların təhsilinə diqqət artırılsın", - xanım Müvəhhidi bildirib.
Onun sözlərinə görə, cari ildə ali məktəblərə qəbul olunan abituriyentlərin 61 faizini qızlar təşkil edib. Bu göstərici İranda qızların təhsilə cəlb olunmasına nə qədər önəm verildiyini göstərir.
O əlavə edib ki, ümumilikdə İranın təhsil strukturlarında çalışanların 60 faizdən çoxu qadınlardır.
İran KİV-lərinin məlumatına görə, cari tədris ili üçün bu ölkədə ali təhsil müəssisələrinə keçirilən qəbul imtahanlarında iştirak üçün 1 milyon 250 min nəfərdən çox abituriyent sənəd verib. Onlardan 600 min nəfəri ali məktəbə qəbul olub.