Azərbaycan, Bakı, 11 yanvar /Trend müxbir H.Vəliyev/
IREX beynəlxalq qeyri-kommersiya təşkilatı Azərbaycanın rayonlarında internet-köşklərin quraşdırmasına başlayıb. Bu barədə çərşənbə Trend-ə IREX-in hüquqşünası Ələsgər Məmmədli deyib.
Onun sözlərinə görə, layihə Azərbaycan Rabitə və İnformasiya Texnologiyaları Nazirliyi və Azərbaycanın poçt rabitə operatoru "Azərpoçt" MMC-nin dəstəyilə həyata keçirilir.
"Avadanlıqlar "Azərpoçt"un poçt şöbələrində quraşadırılacaq. İnternet-köşklərin quraşdırılacağı rayonlar artıq müəyyənləşdirilib. ABŞ-ın Beynəlxalq İnkişaf Agentliyinin (USAİD) qrantı hesabına həyata keçirilən layihə üzrə işin yaxın aylarda başa çatdırılması planlaşdırılır" , - Məmmədli deyib.
Layihənin dəyərinə gəlincə, o, avadanlıqların təchizatçısı məlum olduqdan, zəruri proqram həlləri alındıqdan və avadanlıqların internet şəbəkəsinə çıxışı təmin edildikdən sonra məlum olacaq.
İnternet-köşklərin dəyəri 2,5-4 min dollar arasında dəyişir.
Layihəyə əsasən, internet-köşklər əsasən əhalinin sayı çox və bunun üçün münasib infrastrukturun mövcud olduğu rayon mərkəzləri, kənd və qəsəbələrdə yerləşən "Azərpoçt"un 30 poçt şöbəsində quraşdırılacaq.
İnternet-köşklərin respublikanın rayonlarında quraşdırılmasında əsas məqsəd əhali üçün informasiyaya çıxışı təmin etməkdir ki, vətəndaşlar onlayn-ödənişlər edə, dövlət qurumlarına elektron formada müraciət edə, mövcud problemlərlə bağlı ərizə, şikayətlər verə bilsinlər.