Azərbaycan, Bakı, 16 fevral / Trend müxbir K.Zərbalıyeva/
Sumqayıtın sabiq hərbi komissarı barəsində cinayət işi üzrə məhkəmənin hazırlıq iclası keçirilib.
Bakı Hərbi Məhkəməsindən Trend-ə verilən məlumata görə, hakim Həbib Həsənovun sədrliyi ilə keçirilən iclasda iş üzrə məhkəmə baxışı fevralın 27-nə təyin olunub.
Cinayət işi üzrə sabiq hərbi komissar, polkovnik-leytenant Samir Məmmədov, komissarlığın 2-ci bölməsinin rəisi, polkovnik-leytenant Fəxrəddin Əliyev, hərbi həkim komissiyasının sədri Mirnazir Muxtarov, 2-ci bölmənin rəis köməkçisi vəzifəsini müvəqqəti icra etmiş Azər Xalıqov təqsirləndirilən şəxs qismində tanınıblar.
Sabiq hərbi komissar, 2-ci bölmənin rəisi və həkim komissiyasının sədri Cinayət Məcəlləsinin rüşvət alma (311.3.1, 311.3.2, 311.3.3-cü), vəzifə saxtakarlığı (313-cü), hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə (341.2.1-ci) maddələri ilə ittiham olunurlar.
İttiham aktına görə, hərbi komissar işlədiyi müddətdə rüşvət alaraq bir qrup çağırışçıya hərbi xidmətə çağırışdan möhlət verilməsi və TQDK-ya təqdim etmək barədə arayış verib, bəzi çağırışçıların hərbi xidmətə yararsız hesab edilməsi, hərbi xidmətə yararsız olan çağırışçıların hərbi xidmətə göndərilməsi barədə qanunsuz qərarlar qəbul edib.
Xalıqov isə rüşvətalma cinayətində ittiham olunur.
Qeyd edək ki, Bakı Hərbi Məhkəməsində Suraxanı rayonunun sabiq hərbi komissarı Təvəkkül Ağayev və Xətai rayonun hərbi komissar əvəzi işləmiş Davud Hüseynov barəsindəki cinayət işlərinə baxılır.