Azərbaycan, Bakı, 29 may /Trend, E.Mehdiyev/
Mayın 31-də Azərbaycan Mətbuat Şurasında (MŞ) "Məhəmməd Əmin Rəsulzadə. Əsərləri. 1915-1916-cı illər" kitabının təqdimatı keçiriləcək.
MŞ-dən çərşənbə axşamı Trend-ə verilən məlumata görə, bu cild Rəsulzadə irsinin yorulmaz tədqiqatçısı, Bakı Dövlət Universitetinin jurnalistika fakültəsinin professoru Şirməmməd Hüseynovun uzun və səmərəli axtarışlarının nəticəsi kimi ərsəyə gətirdiyi üçüncü kitabdır.
600 səhifəlik kitaba mütəfəkkirin 1915-1916-cı illərdə "İqbal", "Yeni iqbal", "Açıq söz" qəzetlərində, "Qurtuluş" məcmuəsində işıq üzü görmüş 200-ə yaxın əsəri daxil edilib.
Təqdimat mərasimində MŞ İdarə Heyəti üzvləri, ölkənin müntəzəm yayımlanan, ictimai fikrə təsir göstərən kütləvi informasiya vasitələri təmsilçiləri, jurnalistika sahəsində tanınmış alim və tədqiqatçılar iştirak edəcəklər.
Qeyd edək ki, kitabın birinci cildi 1992-ci ildə nəşr olunub. Birinci cilddə Rəsulzadənin 1903-1909-cu illərdə qələmə aldığı nümunələr toplanıb. İkinci cild 2001-ci ildə oxuculara ərmağan edilib. Kitabda Rəsulzadənin beş ildə (1909-1914) yazdığı əsərlər yer alıb. Üçüncü cildə gəldikdə isə oxucular onun yolunu 11 il gözləməli olublar.