Azərbaycan, Bakı, 31 avqust /Trend, müxbir İ.İsabalayeva/
Azərbaycan Səhiyyə Nazirliyi bu gün səhər saatlarında Bakının Qaradağ rayonunda sərnişin avtobusu ilə qatarın toqquşması hadisəsi ilə bağlı yeni məlumat yayıb.
Nazirliyin mətbuat xidmətindən cümə günü Trend-ə verilən məlumata görə, hadisə nəticəsində ümumilikdə 54 nəfər xəsarət alıb. Yaralılardan hazırda 28 nəfəri Kliniki Tibbi Mərkəzə, 1 nəfər Elmi Tədqiqat Travmatologiya və Ortopediya İnstitutuna, 1 nəfər isə Mərkəzi Neftçilər Xəstəxanasına hospitalizə edilib, 18 nəfərə ambulator yardım göstərilərək evə buraxılıb.
Hadisə yerindəcə dünyasını dəyişmiş 3 cəsəd təcili tibbi yardım tərəfindən Məhkəmə Tibbi Ekspertiza və Patoloji Anatomiya Birliyinə aparılıb. Daha 3 nəfər ağır yaralı sonradan (1-i yolda, 2-si xəstəxanada) dünyasını dəyişib. Ümumilikdə, ölənlərin sayı 6 nəfərdir.
Kliniki Tibbi Mərkəzin baş həkimi Tərlan Bəbirov Trend-ə deyib ki, xəstəxanaya daxil olan yaralılardan birinin ayağı amputasiya olunub. Vəziyyəti ağır olan xəstələrin səhhətində irəliləyiş yoxdur.