Azərbaycan, Bakı, 24 yanvar /Trend/
Türkdilli Ölkələrin Əməkdaşlıq Şurasının baş katibi Xəlil Akıncı Azərbaycan Diplomatik Akademiyasının (ADA) tələbələri qarşısında "Türk dünyasını əməkdaşlıq vasitəsilə tanıtmaq" mövzusunda mühazirə ilə çıxış edib.
Akademiyadan Trend-ə verilən məlumata görə, Akıncı başçılıq etdiyi təşkilat barədə məlumat verərək Azərbaycan, Qazaxstan, Qırğızıstan və Türkiyə tərəfindən əsası qoylmuş qurumun təsis edilməsi barədə sənədin məhz Azərbaycanın Naxçıvan şəhərində qəbul edildiyini diqqətə çatdırıb. O, Şuranın əvvəlki zirvə toplantılarının qurum üçün əhəmiyyətini təhlil edib, sayca üçüncü zirvə toplantısının bu il Bakıda türkdilli dövlətlər arasında nəqliyyat və gömrük əlaqələri mövzusunda keçiriləcəyi barədə planları açıqlayıb.
Tarixə nəzər salan diplomat türkdilli dövlətlərin kökləri və onların bəşəri irsə verdiyi böyük töhfələr barədə də danışıb. O, bildirib ki, vaxtilə geniş coğrafi ərazini əhatə edən türkdilli milllətlər bu gün beynəlxalq aləmdə altı respublika vasitəsilə təmsil edilir. Özbəkistan və Türkmənistanın hazırda qurumda təmsil olunmadığını şərh edən baş katib əminliyini bildirib ki, həmin dövlətlər Şuranın fəaliyyətini izlədikcə daha maraqlı olacaq və üzv olmaq istəyəcəklər.
Mühazirədən sonra səfir Xəlil Akıncı tələbələrin suallarını cavablandırıb, Ermənistan-Azərbaycan, Dağlıq Qarabağ münaqişəsi ilə bağlı türkdilli dövlətlərin mövqeyi barədə fikrini bildirib.