Azərbaycan, Bakı, 15 fevral /Trend, müxbir İ.İzzət/
Tikintinin aparıldığı ərazidə sökülən evlərlə bağlı heç bir şikayət qeydə alınmayıb. Bu barədə "Azeryolservis" ASC-nin mətbuat xidmətinin rəhbəri Pünhan Mürsəliyev Trend-ə bildirib.
Onun sözlərinə görə, Bakının Ziya Bünyadov prospekti ilə Alı Mustafayev, Hüseynbala Əliyev, Salamzadə küçələrinin kəsişməsində müxtəlif səviyyəli yol qovşağının tikintisi davam etdirilir. Yol qovşağı kompleksinə 3 tunel, yolötürücü daxildir. Tunellərdən birində 3-cü mikrorayon qarşısında istinad divarlarının tikintisi başa çatdırılıb. Hazırda pərdələrin betonlanması işləri gedir. İkinci tuneldə svay qazma işləri, üçüncü və birinci tunellərin kəsişməsi monolit betonlanıb.
Yolötürücüyə gəldikdə isə 10 aşırımlı olacaq həmin ötürücünün 5-ci aşırımı betonlanıb, 6-cı aşırımda isə qəliblərin qurulması işləri gedir.
Bundan əlavə, layihə çərçivəsində 3-cü mikrorayon bazarı qarşısındakı yeraltı piyada keçidinin tikintisi işləri aparılır. Ümumilikdə layihənin bu il başa çatdırılması planlaşdırılır.
Xidmət rəhbəri layihə çərçivəsində işlərin aparıldığı əraziyə düşən evlərin söküldüyünü və bu istiqamətdə heç bir problemin olmadığını da deyib.
"Ərazidə tikinti altına düşən evlər mərhələlərlə sökülür. Bu sahədə hər hansı problem və ya etiraz yoxdur. Söküntü işləri mənzil sahiblərinə bazar qiymətlərinə uyğun kompensasiya ödəndikdən sonra aparılır", - Mürsəliyev əlavə edib.
