Azərbaycan, Bakı, 22 fevral /Trend, müxbir İ.İsabalayeva/
Doktorantlara təhsil aldıqları müddətdə həqiqi hərbi xidmətə çağırışdan möhlət hüququnun verilməsi nəzərdə tutulur. Trend-in məlumatına görə, bunu cümə günü jurnalistlərə Milli Məcliisn Elm və təhsil komitəsinin sədri Şəmsəddin Hacıyev deyib.
"Hazırda doktorantlara təhsil aldıqları müddətdə möhlət hüququnun verilməsi məsələsini baxılır. Ona görə də mənə elə gəlir ki, bu məsələ MM-də müsbət həll olunacaq.
"Onlar 3 il ərzində müdafiə edib, elmi dərəcə almalıdırlar",- Haciyev deyib.
Deputatın sözlərinə görə, təcrübə göstərir ki, doktorantların heç 10 faizi də 3 il ərzində müdafiə edə bilmirlər. O qeyd edib ki, il ərzində cəmi 500 adam doktoranturaya qəbul olunur. Onların da yarıdan çoxu qızlardır.
Hacıyev deyib ki, elmə gənc insanlar gəlməlidir.
"Təcrübə göstərir ki, hərbi xidmətə getmək istedadlı gənclərin bir çoxunu elmdən uzaqlaşdırır. Bu məsələni qaldıracağıq. Bu məsələdə müstəsna səlahiyyət ölkə prezidentinə məxsusdur", deyə deputat əlavə edib.