...

Balakən meşə mühafizəsi və bərpası müəssisəsinin direktoru işdən azad edilib

Cəmiyyət Materials 27 Mart 2013 17:48 (UTC +04:00)
Meşələrin qorunub mühafizə olunmasını qeyri-qənaətbəxş təşkil etdiyinə görə Balakən meşə mühafizəsi və bərpası müəssisəsinin direktoru işdən azad edilib.
Balakən meşə mühafizəsi və bərpası müəssisəsinin direktoru işdən azad edilib

Azərbaycan, Bakı, 27 mart /Trend, müxbir İ.İsabalayeva/

Meşələrin qorunub mühafizə olunmasını qeyri-qənaətbəxş təşkil etdiyinə görə Balakən meşə mühafizəsi və bərpası müəssisəsinin direktoru işdən azad edilib.

Ekologiya və Təbii Sərvətlər Nazirliyinin mətbuat xidmətindən Trend-ə verilən məlumata görə, nazirliyin əməkdaşları tərəfindən Balakən meşə mühafizəsi və bərpası müəssisəsində (MMBM) meşələrin qorunub mühafizə olunması vəziyyətini yoxlamaq məqsədilə araşdırma aparılıb. Araşdırma zamanı Balakən MMBM-in 5 meşə dolayında 797,23 m3 həcmində, 3606,81 manat köküstə nırx dəyərində ağacların qanunsuz kəsilməsi faktı aşkar edilib.

Bundan başqa, Meşələrin İnkişafı Departamentinin əməkdaşları tərəfindən son günlərdə Balakən MMBM-in ərazisində aparılmış qəfləti yoxlamalar zamanı 171,45 m3 həcmində, 690,18 manat köküstə nırx dəyərində qanunsuz ağac kəsilməsi faktı da müəyyən olunub.

Araşdırmalar zamanı Balakən meşə mühafizəsi və bərpası müəssisəsinin rəhbər vəzifəli şəxslərinin öz vəzifə borclarını layiqincə icra etməmələri nəticəsində meşələrin qorunub mühafizə olunmasında ciddi qanun pozuntularına, qanunsuz qırıntılara yol verildiyi müəyyən edilib. Araşdırmalar zamanı aşkar olunmuş özbaşına qırıntılara görə hesablanmış 4296,99 manat məbləğində ziyanın təqsirkarlar tərəfindən ödənilməsi təmin olunub.

Meşələrin qorunub mühafizə olunmasını qeyri-qənaətbəxş təşkil edərək əmək müqaviləsi üzrə öhdəliklərini yerinə yetirmədiyinə görə Balakən MMBM-in direktoru işdən azad edilib, onunla bağlanmış əmək müqaviləsinə xitam verilib. Yol verilmiş qanun pozuntularına görə cavabdeh olan digər işçilər barəsində də qanunamüvafiq qaydada ciddi intizam tənbehi tədbirləri görülüb.

Məqalədə:
Xəbər lenti

Xəbər lenti