Azərbaycan, Bakı, 8 iyul /Trend, müxbir A.Məmmədov/
Bakı Ağır Cinayətlər Məhkəməsində saxta əsginazların dövriyyəsi ilə məşğul olmaqda ittiham olunan Polad Salmanov, Rac Süleymanov və Fəxriyyə Qarayevanın cinayət işi üzrə məhkəmə başa çatıb.
Trend-in məlumatına görə, hakim Cavid Hüseynovun sədrliyi ilə keçirilən prosesdə təqsirləndirilən şəxslərə hökm oxunub. Məhkəmənin hökmü ilə Rac Süleymanov 8 il 6 ay, Polad Salmanov 8 il 6 ay, Fəxriyyə Qarayeva 8 il müddətinə azadlıqdan məhrum ediliblər.
İttihama görə, təqsirləndirilən şəxslər Bakının Nizami rayon Polis İdarəsinin əməkdaşlarının həyata keçirdikləri əməliyyat-axtarış tədbirləri nəticəsində tutulublar. Rac Süleymanovun mənzilinə baxış zamanı oradan 113 ədəd 100 manatlıq, 51 ədəd 50 manatlıq saxta əsginazlar aşkar edilərək götürülüb. Bundan başqa, saxlanılan şəxslərin narkotik vasitələrin alqı-satqısı ilə məşğul olmaları da müəyyən edilib.
Təqsirləndirilən şəxslər Cinayət Məcəlləsinin 204.3.2-ci (mütəşəkkil dəstə tərəfindən saxta pul və ya qiymətli kağızlar hazırlama, əldə etmə və ya satma), 234.4.1, 234.4.3-cü (qabaqcadan əlbir olan bir qrup şəxs tərəfindən satış məqsədi ilə qanunsuz olaraq külli miqdarda narkotik vasitələri əldə etmə, saxlama, daşıma, göndərmə və ya satma) maddələri ilə ittiham ediliblər.