...

Gədəbəydə torpaq sürüşməsi - əhalinin rayon mərkəzi ilə əlaqəsi kəsilib (ÖZƏL) (FOTO) (YENİLƏNİB)

Cəmiyyət Materials 30 Avqust 2016 11:10 (UTC +04:00)
Gədəbəydə torpaq sürüşməsi - əhalinin rayon mərkəzi ilə əlaqəsi kəsilib (FOTO)
Gədəbəydə torpaq sürüşməsi - əhalinin rayon mərkəzi ilə əlaqəsi kəsilib (ÖZƏL) (FOTO) (YENİLƏNİB)

Trend-i buradan izləyin

Bakı. Samir Əli - Trend:

Gədəbəy rayonunun Hacılar kəndi sahəsində torpaq sürüşməsi baş verib.

Bu barədə Trend-ə Azərbaycan Milli Elmlər Akademiyasının Coğrafiya İnstitutunun Azərbaycanın iqtisadi və siyasi coğrafiyası şöbəsinin müdiri Nəriman Paşayev məlumat verib.

Onun sözlərinə görə, kənd ərazisində torpaq sürüşməsi iyun ayından başlayıb: "Son vaxtlar sürüşmə daha da fəallaşıb. Nəticədə Hacılar kəndinin rayon mərkəzi ilə və digər kəndlərlə əlaqəsi kəsilib. Hadisə nəticəsində kəndin 5 hektardan çox biçənək və kartof əkin sahəsi yararsız hala düşüb. Sürüşmə kəndin ərazisində 10 yerdə baş verib. Amma Hacılar kənd dairəsinin Əyridərə kəndi ərazisində baş verən sürüşmə nəticəsində daha böyük çökmə baş verib. Çaykənarı deyilən ərazidəki bəzi evlərdə çatlar əmələ gəlib. Bundan başqa, kəndin yeganə avtomobil yolunun 200 metrdən çox hissəsi çöküb. Hazırda əhalinin gediş-gəlişi dayanıb. Əhali nəinki avtomobil yolu ilə, piyada yolu ilə də hərəkət edə bilmir. Çökmənin eni 30 metr, dərinliyi 5 metr, uzunluğu 50 metrdir".

N.Paşayev bildirib ki, adıçəkilən kənd Ermənistanla sərhədin 1 kilometrliyində yerləşir: "Hazırda həmin ərazidən gəlirəm. Əhali çox əziyyət çəkir. Bu barədə rayon İcra Hakimiyyətinə və Fövqəladə Hallar Nazirliyinə müraciət etmişəm".

FHN-nin Mətbuat xidmətinin rəhbəri Oqtay Bayramov Trend-ə açıqlamasında bildirib ki, adıçəkilən ərazidə topraq sürüşməsi 4 ay əvvəl olub. O qeyd edib ki, hadisə nəticəsində həqiqətən də rayonun Hacılar və Əyridərə kəndləri arasında əlaqə kəsilib.

O.Bayramovun sözlərinə görə, hazırda sürüşmənin törətdiyi fəsadların aradan qaldırılması istiqamətində iş aparılır.

Məqalədə:
Xəbər lenti

Xəbər lenti