Bakı. Trend:
Prezident yanında Gənclər Fondunun dəstəyi ilə “İRƏLİ” İctimai Birliyi tərəfindən “Gənc Əkinçi” Akademiyası II dəfə yenidən başlayıb.
Təşkilatdan Trend-ə verilən məlumata görə, “İRƏLİ” İctimai Birliyi tərəfindən gənc jurnalistlərin iştirakı ilə həyata keçirilən yay və qış məktəbləri öz uğurlu nəticələri ilə hər zaman diqqət çəkib.
“Gənc Əkinçi-2” gənc jurnalistlər üçün peşəkarlıq dərəcələrinin artırılması, yeni əlaqələrin qurulması, o cümlədən asudə vaxtlarının səmərəli keçirilməsinə şərait yaradacaq. Əsas hədəflərindən biri də Milli mətbuatımızın ilk nümunəsi olan tarixi “Əkinçi” qəzetinin yaşadılması və gənclər arasında təbliğidir.
Gənc Əkinçi Akademiyasının açılış mərasimində Azərbaycan Mətbuat Şurasının rəhbəri Əflatun Amaşov nitqində hər bir xalqın inkişafında milli mətbuatın böyük rol oynadığını vurğulayıb. Əkinçi qəzetinin tarixinə toxunub, “Əkinçi” qəzetinin milli şüuru, milli məfkurəni, milli mənliyi oyatması və inkaşaf etməsinə təkan olması haqqında gənc layihə iştirakçıları əlavə biliklərlə məlumatlandırıb, bununla da mətbuatın inkişafının başlandığını vurğulayıb. Və bunu da qeyd edib ki, istər əsrin əvvəllərində, istər ortasınada, istərsə də sonlarında jurnalist fəaliyyətinin ən üstün cəhəti xalqın gördüyü işi ölkə daxilində və xaricində işıqlandırmasıdır.
Bakı Dövlət Universitetinin dekanı, İctimai Televiziya və Radio yayımları Şirkətinin Yayım Şurasının sədri Cahangir Məmmədli Jurnalist peşəsinin çətinliyi, jurnalist etikası mövzusunda fikirlərini səsləndirib, ən əsası isə Milli mətbuatımızın əsası olan Əkinçi qəzetindən başlayaraq mətbuat tariximizə toxunub, maraqlı məlumatları gənc jurnalistlərlə bölüşüb.
Daha sonra isə Beynəlxalq Avrasiya Mətbuat Fondunun Sədri Umud Mirzəyev çıxış edib. Ekspert qismində mətbuat ilə bağlı fikirlərini bölüşüb.
Gənclər Fondunun Strateji planlaşdırma və beynəlxalq əlaqələr sektorunun müdiri Orxan Ərəbov gənclərə hər zaman dəstək olduqlarını bildirib və bu kimi layihələrin qəbulunu vurğulayıb. Eyni zamanda da sərhəddə yaşayan gənclərin digər regionlarda keçirilən təlim və tədbirlərdə iştirak etdiyini vurğulayıb.
2015-ci ilin iyul ayının 22-də, 4000 tirajda "Gənc Əkinçi" qəzetinin ilk nömrəsi çapdan çıxıb və bu Milli mətbuat günündə reallaşıb. Layihənin davamı olaraq həyata keçiriləcək olan akademiyada formalaşan yeni gənc jurnalistlər komandası tərəfindən “Gənc Əkinçi” qəzetinin növbəti nəşrlərinin çap olunmasını hədəfləyib. Gənclərin köşə yazıları, Azərbaycanda aparılan gənclər siyasəti haqqında məlumatların, eynisi ilə gənclərin maraq dairələrinə uyğun yeni bir qəzetin yaradılması layihənin davamlı olaraq oxuculara yeni informasiyaların verilməsini təmin edəcək.
Qeyd edək ki, Gənc Əkinçi Akademiyası 2015-ci ildə İsmayıllı rayonunda baş tutub.
