...

Bolqarıstanın Ruen şəhərində Azərbaycan Xalq Cümhuriyyətinin 100 illik yubileyi qeyd olunub (FOTO)

Cəmiyyət Materials 8 May 2018 13:24 (UTC +04:00)
Heydər Əliyev Fondunun vitse-prezidenti Leyla Əliyevanın icraçı prodüseri olduğu “Əli və Nino” filmi nümayiş olunub.
Bolqarıstanın Ruen şəhərində Azərbaycan Xalq Cümhuriyyətinin 100 illik yubileyi qeyd olunub (FOTO)

Trend-i buradan izləyin

Bakı. Trend:

Bolqarıstanın Ruen şəhərində Azərbaycan Xalq Cümhuriyyətinin 100 illik yubileyi qeyd olunub.

Azərbaycanın Bolqarıstandakı səfirliyindən Trend-ə verilən məlumata görə, gecədə Heydər Əliyev Fondunun vitse-prezidenti Leyla Əliyevanın icraçı prodüseri olduğu “Əli və Nino” filmi nümayiş olunub.

Nümayişdə Ruen bələdiyyəsinin meri İsmail Osman, şəhər icma şurasının sədri Əşrəf Əşrəf, Bolqarıstan Respublikasının Xalq Məclisinin deputatı, Bolqarıstan-Azərbaycan dostluq qrupunun üzvü Sevim Əli, Avropa Parlamentinin Bolqarıstandan olan deputatı, Avropa naminə Liberalların və Demokratların Alyansı Qrupunun (ALDE) vitse-prezidenti İlhan Küçük, eləcə də şəhər bələdiyyəsinin digər rəsmi şəxsləri iştirak ediblər.

Gecənin açılışında çıxış edən səfir N.Qurbanova Ruen şəhərində təşkil olunan tədbirin bir sıra əlamətdar yubileylər, o cümlədən, müsəlman Şərqində ilk parlament respublikası AXC-nin yaradılmasının 100-cü ildönümü ilə bağlı olduğunu qeyd edib. AXC-nin yaradılmasını xalqımızın tarixində mühüm hadisə kimi qiymətləndirən səfir cəmi 23 ay yaşamasına baxmayaraq, AXC-nin qısa müddətdə həyata keçirdiyi tədbirlər barədə məlumat verib, onun xalqımızın tarixində buraxdığı silinməz izlər, milli dövlətçilik ənənələrimizin bərpasında böyük rolundan danışıb.

N.Qurbanova ölkə başçısının AXC ilə bağlı fikirlərinə istinad edərək Şərqdə demokratiyanın əsasını qoyan məhz Azərbaycan xalqı olduğunu tədbir iştirakçılarının diqqətinə çatdırıb. AXC dövründə əsası qoyulan demokratik ənənələrin bu gün də davam etdiyini qeyd edən səfir xalqımızın yalnız qədim tarixə və demokratik ənənələrə deyil, həmçinin zəngin mədəniyyət, ədəbiyyat, incəsənət və musiqiyə malik olduğunu, 145 illik milli teatr, 120 illik kinematoqrafiya və 110 illik opera tariximizin bunu sübut etdiyini əlavə edib.

AXC-nin süqutundan 71 il sonra, 1991-ci ildə Azərbaycan Respublikasının dövlət müstəqilliyinin bərpa edərək dünya ictimaiyyətinə müstəqil dövlət kimi qoşulduğunu bildirən səfir müstəqilliyimizin ilk illərinin çox ağır bir zamana təsadüf etməsi, ölkəmizin Ermənistan tərəfindən hərbi təcavüzə məruz qalması, ərazilərimizin 20 faizinin işğal olunması və 1 milyona yaxın azərbaycanlının qaçqın və məcburi köçkünə çevrilməsi barədə ətraflı məlumat verib. Bütün bu çətinliklərə baxmayaraq son 25 il ərzində Azərbaycanın çox uğurlu bir inkişaf yolunu keçərək qlobal və regional proseslərə böyük töhfə verən ölkəyə çevrildiyini vurğulayan N.Qurbanova bu uğurlu siyasətin əsasının Ümummilli Lider Heydər Əliyev tərəfindən qoyulması və Prezident İlham Əliyev tərəfindən yüksək səviyyədə davam etdirilməsindən bəhs edib. O, deyib ki, nəticədə ölkəmiz həm siyasi, həm də sosial-iqtisadi baxımdan öz nüfuzunu artıra bilib və tək Azərbaycan deyil, digər qonşu ölkələrin də inkişafına vacib töhfə verib, bir çox iri miqyaslı layihələrə imza atıb. Səfir Bakı-Tbilisi-Qars dəmir yolu, Cənub Qaz Dəhlizi layihələrini sadalayaraq onların Ümummilli Lider Heydər Əliyevin uzaqgörən siyasətinin uğurlu bəhrəsi olduğunu əlavə edib. Səfir xalqın iradəsi ilə yenidən 1993-cü ilin iyun ayında hakimiyyətə gələrək, mürəkkəb vəzifəni üzərinə götürərək Azərbaycanı çətin durumdan çıxaran şəxsin məhz Heydər Əliyev olduğunu diqqətə çatdırıb və xalqımız tərəfindən cari ildə 95 illik yubileyi qeyd olunan bu dahi şəxsiyyətin əziz xatirəsinin dərin hörmət və ehtiramla yad edildiyindən söz açıb.

Daha sonra Azərbaycan-Bolqarıstan münasibətlərinə toxunan səfir ötən il ölkələrimiz arasında diplomatik münasibətlərinin qurulmasının 25-ci ildönümünün qeyd olunduğu, strateji tərəfdaş olan ölkələrimiz arasında müxtəlif sahələrdə əməkdaşlıq üçün böyük potensialın mövcud olduğunu söyləyib. 16 yanvar 2018-ci il tarixindən etibarən fəaliyyətə başlamış və Azərbaycanın ilk aşağıbüdcəli aviaşirkəti olan “Buta Airways” şirkəti tərəfindən həyata keçirilən Bakı-Sofiya birbaşa hava əlaqəsini ölkələrimiz arasında əməkdaşlığın parlaq nümunəsi kimi xarakterizə edən səfir ölkələrimiz arasında əməkdaşlığın gücləndirilməsi məqsədilə mövcud potensialın reallaşdırılması kontekstində ölkəmizin Bolqarıstanın regionları ilə əməkdaşlıq əlaqələrinin inkişaf etdirilməsinə böyük diqqət verdiyini xüsusi vurğulayıb.

Sivilizasiyalar və mədəniyyətlərin qovşağında yerləşən Azərbaycanın daima müxtəlif dinlərin, etnik qrupların və mədəniyyətlərin nümayəndələrinin sülh, əmin-amanlıq, tolerantlıq şəraitində birgə yaşadığı məkan olduğunu söyləyən səfir Azərbaycanın İslam dünyasındakı rolu və nüfuzundan da bəhs edərək qeyd edib ki, 5 minillik tarixə malik qədim Naxçıvan şəhəri 2018-ci il İslam dünyasının mədəniyyəti paytaxtı elan edilib. Şəhərin “İslam mədəniyyətinin paytaxtı” adına layiq görülməsi Azərbaycan xalqının tarixi-mədəni irsinə İslam aləmində verilən yüksək qiymətin nəticəsidir.

Sonda nümayiş olunacaq “Əli və Nino” filmi barədə məlumat verən N.Qurbanova sözügedən filmin, demək olar ki, yuxarıda sadalanan bütün məqamları özündə ehtiva etdyini əlavə edib. O deyib ki, bir tərəfdən, film müsəlman azərbaycanlı gənc ilə xristian gürcü qızının məhəbbəti barədədirsə, digər tərəfdən, AXC-nin yaradılmasından öncə və sonra Azərbaycanda cərəyan edən siyasi prosesləri təsvir edir.

Daha sonra Ruen bələdiyyəsinin meri İ.Osman, şəhər icma şurasının sədri Ə.Əşrəf, Bolqarıstan Xalq Məclisinin deputatı, Bolqarıstan-Azərbaycan dostluq qrupunun üzvü S.Əli, Avropa Parlamentinin Bolqarıstandan olan deputatı, Avropa naminə Liberalların və Demokratların Alyansı Qrupunun (ALDE) vitse-prezidenti İ.Küçük çıxış edərək səfir N.Qurbanovanın Ruen şəhərinə səfərini, AXC-nin 100 illik yubileyi kimi əlamətdar tarixi hadisənin qeyd olunması çərçivəsində belə bir tədbirin təşkilini yüksək qiymətləndirib, ölkələrimiz arasında əməkdaşlığın, o cümlədən mədəni sahədə əlaqələrin inkişafı baxımından əhəmiyyətini qeyd ediblər. Azərbaycan-Bolqarıstan arasında münasibətlərin inkişafından məmnunluq ifadə edən natiqlər bu əlaqələrin bundan sonra daha da möhkəmlənəcəyinə, xüsusilə Bakı-Sofiya birbaşa hava əlaqəsinin bu prosesə əlavə töhfə verəcəyinə ümidlərini bildiriblər.

Gecədə qonaqlara Azərbaycan milli mətbəxinin nümunələri təqdim olunmuş və onlar tərəfindən böyük rəğbətlə qarşılanıb.

Filmin nümayişindən sonra yerli folklor qrupunun ifasında rəqs nümunələri təqdim edilib və Azərbaycan və türk mahnılarından ibarət rəngarəng musiqi çələngi səsləndirilib.

Məqalədə:
Xəbər lenti

Xəbər lenti