Bakı. Trend:
Dekabrın 19-da Azərbaycan Dövlət Pedaqoji Universitetinin (ADPU) Fizika fakültəsində dekan seçkiləri keçirilib.
Fakültənin 38 əməkdaşından 35-nin iştirak etdiyi
seçkilərdə son dekan dosent Arzu Daşdəmirov və dosent Sultanəli
Qurbanov dekanlığa namizədliyini irəli sürüblər.
Dekan seçkiləri ilə bağlı fakültənin ümumi iclasına sədrliyi
Universitetin tədris işləri üzrə prorektoru dosent Eldar Aslanov,
katibliyi isə Elmi katibliyin əməkdaşı Şəfa Əhmədova icra edib.
Ümumi işlər üzrə prorektor Tural Cəlilov, rektorun müşaviri Ümid Mehdiyev, Tədris Departamentinin direktoru dosent Sənan Əliyev və İnsan resursları şöbəsinin müdiri Qumral Qədimova, həmçinin universitet və fakültə ictimai təşkilatlarının nümayəndələri seçkidə müşahidəçi qismində iştirak ediblər.
Əvvəlcə açılış nitqi ilə çıxış edən dos. Eldar Aslanov
bildirib ki, hər iki namizəd seçkilərə qədər fakültənin
kafedralarında professor-müəllim heyəti ilə görüşlər keçirərək öz
platformalarını ətraflı təqdim ediblər. Prorektor bildirib ki,
qaydalara uyğun olaraq dekanlığa namizədlərin haqqında məlumat
verilməli, platformalar dinlənməli və təqdimatlar ətrafında
müzakirələrdən sonra fakültə kollektivi gizli səsvermə yolu ilə
yeni dekanı seçməlidir. Bu prosedura uyğun olaraq dekan vəzifəsinə
namizəd dos. Arzu Daşdəmirov çıxış edərək seçiləcəyi təqdirdə
növbəti 5 illik üçün fakültədə icra olunacaq işlərlə bağlı
platformasının əsas tezislərini təqdim edərək, bundan sonra da əsas
diqqətin yeni təlim metodlarının və innovasiyaların inkişafına
yönəldiləcəyini diqqətə çatdırıb. Digər namizəd dos. Sultanəli
Qurbanov obyektiv səbəblərdən seçki iclasında iştirak etmədiyindən
çıxışdan sonra müzakirələrə keçilib. Müzakirələrdə namizədlərin
təqdim etdikləri platformalar ətrafında fikir mübadiləsi aparılıb,
namizədlər haqqında rəylər dinlənilib.
Daha sonra gizli səsvermənin aparılması üçün fakültə
əməkdaşlarından prof. Vaqif Nəsirov, b/m. Gülşən Musayeva və b/m.
Ədalət Quliyevdən ibarət Hesablayıcı Komissiya formalaşdırılıb.
Gizli səsvermənin nəticələrinə əsasən, dos. Arzu Daşdəmirov növbəti 5 il üçün yenidən ADPU-nun Fizika fakültəsinin dekanı seçilib.
