Bakı. Trend:
Xocalı rayonunun Ballıca kəndində 172 ailənin, yəni 811 nəfərin daimi məskunlaşması təmin olunub.
Əhalinin su ilə təminatı ilə bağlı İri Şəhərlərin Birləşmiş Su Təchizatı Xidmətindən Trend-in sorğusuna cavab olaraq bildiriblər ki, Ballıca kəndindən 12 km aralıda Ballıca çayının üzərində suqəbuledici qurğu inşa edilib.
"Qurğudan içməli su kəndin ərazisində olan 2 ədəd su anbarına ötürülür və özüaxımı ilə əhaliyə çatdırılır. Əhali 24 saat keyfiyyətli içməli su ilə təmin olunur", - deyə qurumdan məlumat verilib.
Qeyd edək ki, hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 mindən çox insan yaşayır.