Ramil Səfərovun atası : " Ramil Səfərovun müdafiəsi düzgün qurulmamışdı və ona verilən ömürlük həbs cəzasının qüvvədə saxlanılması bunun nəticəsidir "
Azərbaycan, Bakı/müxbir Trend İ.Əlizadə/Ramil Səfərovun müdafiəsi düzgün qurulmamışdı və ona verilən ömürlük həbs cəzasının qüvvədə saxlanılması bunun nəticəsidir. Bu sözləri Ramil Səfərovun Hüquqlarının Müdafiəsi üzrə Koordinasiya Şurasının fevralın 23-də Beynəlxalq Mətbuat Mərkəzində keçirdiyi mətbuat konfransında Ramil Səfərovun atası Sahib Səfərov deyib.
S.Səfərov qeyd edib ki, oğlunun müdafiəsi üçün mətbuatda bəyan olunan işlərin əksəriyyəti həyata keçirilməyib.
Onun sözlərinə görə, Ramil Səfərovun müdafiəsi üçün vəkil tutan zaman xeyli çətinliklə üzləşiblər.
"Azərbaycanın rəsmi orqanları bir dəfə də Ramil Səfərovun işi ilə maraqlanmayıb. Müdafiə Nazirliyi isə öz zabitinin taleyi ilə maraqlanmayıb. Biz İkram Şirinov və Elman Kərimovu vəkil kimi işə cəlb edən zaman müraciət etmədiyimiz ünvan qalmadı. Müdafiə Nazirlyi isə 4-5 ay ərzində bir dəfə də bu vəkillərin nə işlə məşğul olduqları, nəyə ehtiyacları olduğu ilə maraqlanmadı. Macarıstan məhkəməsi bu cəzanı təkcə Ramilə deyil, bütün Azərbaycana verib", - deyə S.Səfərov bildirib.
Koordinasiya Şurasının üzvü, millət vəkili Zahid Oruc isə Apellyasiya Məhkəməsinin qərarının onlar üçün gözlənilməz olduğunu deyib. Deputat vurğulayıb ki, bundan sonra Ramil Səfərovun müdafiəsi üçün görəcəkləri işləri məxfi saxlayacaqlar.
Koordinasiya Şurasının digər üzvü, deputat Azay Quliyev bildirib ki, Macarıstan Apellyasiya Məhkəməsinin qərarı obyektiv deyil: "Mən əminəm ki, bu işi əgər Ramil Səfərov deyil, erməni törətsəydi, Macarıstan məhkəməsinin qərarı fərqli olardı".
Xatırladaq ki, fevralın 21-də Macarıstanın Apellyasiya Məhkəməsi Azərbaycan Silahlı Qüvvələrinin baş leytenantı Ramil Səfərovun ömürlük həbs cəzasına məhkum olunması haqqında hökmü qüvvədə saxlayıb. R.Səfərov Ermənistan ordusunun zabiti Qurgen Markaryanı öldürməkdə günahkar bilinir.
