Azərbaycan, Bakı / Trend müxbir K.Zərbalıyeva/ Bu gün Apellyasiya Məhkəməsində hakim Qayıl Məmmədovun sədrliyi ilə Prezident Aparatı İşlər İdarəsinin sabiq müdiri Akif Muradverdiyev barəsində hökmdən verilmiş apellyasiya şikayəti üzrə məhkəmə prosesi yekunlaşıb. Məhkəmədən verilən məlumata görə, dövlət ittihamçısı Agır Cinayətlərə Dair İşlər üzrə Məhkəmənin A.Muradverdiyev barəsində çıxardığı hökmün qüvvədə saxlanılmasını istəyib. Təqsirləndirilənin vəkilinin çıxışından sonra məhkəmə yekun qərarını elan edib. Apellyasiya Məhkəməsi A.Muradverdiyev barəsindəki hökmü qüvvədə saxlayıb. A. Muradverdiyevin vəkili Rəşad Mirmehdizadə bildirib ki, Apellyasiya məhkəməsinin qərarından Ali Məhkəməyə kassasiya şikayəti verəcəklər.
Ağır Cinayətlərə Dair İşlər üzrə Məhkəmənin hakimi Tofiq Paşayevin sədrliyi ilə keçirilən prosesdə məhkəmənin hökmü ilə A. Muradverdiyev 6 il müddətinə azadlıqdan məhrum edilmişdi. A. Muradverdiyev Cinayət Məcəlləsinin 179.3.2-ci (külli miqdarda dövlət əmlakını mənimsəmə), 308.2-ci (vəzifə səlahiyyətlərindən sui-istifadə), 311-ci (rüşvət alma), 313-cü (vəzifə saxtakarlığı) maddələri ilə ittiham olunur. Onun barəsində Cinayət Məcəlləsinin 28.278 (hakimiyyəti zorla ələ keçirməyə cəhd) və 28. 220 (kütləvi iğtişaşa hazırlıq) maddələri ilə irəli sürülmüş ittiham üzrə başlanmış cinayət işinin istintaqı isə davam edir. Hazırda A. Muradverdiyev Penitensiar Xidmətin Müalicə Müəssisəsində müalicə olunur.
