Azərbaycan, Bakı / Trend müxbir İ.Əlizadə/ 2015-ci ilə qədər 5 min nəfər azərbaycanlı tələbə təhsil almaq üçün xarici ölkələrin universitetlərinə göndəriləcək. Bu barədə şənbə günü Bakıda təhsil nazirinin müavini Elmar Qasımov məlumat verib.
Nazir müavini qeyd edib ki, xaricə göndəriləcək tələbələrin bütün xərcləri dövlət hesabına ödəniləcək. Eyni zamanda, həmin tələbələr Azərbaycana gayıdandan sonra dövlət strukturlarında işlə təmin olunacaqlar. Qasımov vurğulayıb ki, Azərbaycan iqtisadiyatının inkişafı yeni sahələr üzrə ixtisaslaşmış kadrlara zərurət yaradır.
Onun sözlərinə görə, ölkənin kadr problemini həll etmək üçün dövlət hesabına tələbələr əsasən ABŞ, Böyük Britaniya, Fransa, Yaponiya. Malayziya, Almaniya və digər ölkələrin aparıcı universitetlərinə göndəriləcəklər. Nazir müavini onu da qeyd edib ki, hazırda üç min azərbaycanlı tələbə xarici ölkələrin universitetlərində təhsil alırlar. Onların min nəfəri dövlət hesabına göndərilib, əsasən Türkiyə, Rumıniya, Rusiya, Misir və digər ölkələrin universitetlərində təhsil alırlar.
İki min nəfər tələbə isə öz hesabına, müxtəlif proqramlarda iştirak etməklə xaricə təhsil almağa gediblər və əsasən Almaniya, Böyük Britaniya, Fransa və digər ölkələrin universitetlərində oxuyurlar.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
