Azərbaycan, Bakı, 9 aprel /Trend/
Bakı-2015 Avropa Oyunları Əməliyyat Komitəsi (BAOƏK) Birinci Avropa Oyunlarını nümayiş etdirmək üçün Avstraliyanın Olimpiya Oyunları teleyayımçısı "Seven Network" kanalı ilə müqavilə imzalayıb.
Komitədən Trend-ə verilən məlumata görə, Avstraliyanın ödənişsiz teleyayım üzrə aparıcı kanalı Birinci Avropa Oyunlarının ölkə üzrə 8.4 milyon evə gündəlik yayımını öhdəsinə götürüb. "Seven Network" kanalı 2007-ci ildən bəri Avstraliyanın ən reytinqli televiziya kanalıdır.
"Seven Network" kanalı ilə bağlanmış müqavilə Avropa teleyayımçıları ilə yanaşı, Amerika Birləşmiş Ştatları, Kanada, Hindistan, Çin və ərəb ölkələri ilə imzalanmış müqavilələr sayəsində dünyanın dörd bir yanında Birinci Avropa Oyunlarının daha çox tamaşaçı kütləsi tərəfindən izlənilməsini təmin edir.
BAOƏK-in əməliyyatlar üzrə baş direktoru Saymon Kleq "Seven Network" kanalının Olimpiya Oyunlarının nüfuzlu teleyayımçısı olduğunu bildirib və qeyd edib ki, bu kanalın Birinci Avropa Oyunlarının teleyayımını öhdəsinə götürməsi Bakı-2015-in beynəlxalq idman tarixinə mühüm töhfə olduğunu bir daha təsdiq edir.
Bu sazişlə Bakı-2015 Birinci Avropa Oyunları bağlanmış yayım müqavilələrinin sayını 57-yə çatdırdı. "Seven Network" kanalının idman şöbəsinin direktoru Sol Ştayn əlavə edib: "Bizim vəzifəmiz mötəbər idman tədbirlərini tamaşaçılarımıza təqdim etməkdir. Birinci Avropa Oyunlarının uzunmüddətli teleyayımını həyata keçirdiyimiz Olimpiya Oyunları və ilk dəfə ödənişsiz yayımını təşkil etmək üçün müqavilə imzaladığımız Paralimpiya Oyunları ilə mükəmməl uyğunluq təşkil etdiyini düşünürük".