Bakı. Trend:
Bakıda keçirilən Dünya kubokunun təşkilatçıları bütün yarış iştirakçılarının rahatlığının qayğısına qalırlar.
Bunu cümə günü Trend-ə yarış iştirakçısı, sloveniyalı gimnast Briqita Kraşovets deyib.
"Bu mənim Azərbaycana ikinci səfərimdir, ilk dəfə burada 2018-ci ildə çıxış etmişəm. Zal və burada hökm sürən atmosfer xoşuma gəlir. Kubok ən yüksək səviyyədə keçirilir, təşkilatçılar daima nəyəsə ehtiyacımız olub-olmadığı ilə maraqlanırlar, qayğımıza qalırlar. Bu çox xoşdur", - deyə o qeyd edib.
Kvalifikasiyadakı çıxışını şərh edən idmançı qeyd edib ki, halqa ilə çıxışından çox da razı qalmayıb, lakin topla hərəkət onda daha çox yaxşı alınıb.
"Bakıda tamaşaçılar çox xoşrəftardırlar, tribunalarda izləyicilər gimnastın hansı ölkəni təmsil etdiyindən asılı olmayaraq hər kəsə azarkeşlik edirlər. Bu cür dəstək olduqca vacibdir", - deyə Kraşovets əlavə edib.
Qeyd edək ki, bədii gimnastika üzrə FIG Dünya kuboku yarışları 21-23 aprel tarixləri arasında keçirilir. Yarışlarda dünyanın 40 ölkəsindən 135 gimnast fərdi və qrup hərəkətləri proqramında çıxış edirlər.
Azərbaycanı fərdi proqramda Zöhrə Ağamirova və Alina Gözəlova, qrup hərəkətləri proqramında isə Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan və Darya Sorokinadan ibarət komanda təmsil edirlər.
Gimnastlar ayrı-ayrı alətlər üzrə və çoxnövçülük yarışlarında mükafatlar uğrunda mübarizə aparırlar. Ənənə üzrə AGF Trophy Kuboku çıxışına görə ən yüksək bal toplamış idmançıya və qrup komandasına təqdim olunacaq.
(Tərcümə: Rəna Əbdürəhmanova)