Bakı. Trend:
Türkiyənin “Qalatasaray” və “Trabzonspor” klubları 5 yanvar tarixində keçirilməsi nəzərdə tutulan Superkubokun yarımfinal qarşılaşmasının vaxtının dəyişdirilməsi üçün Türkiyə Futbol Federasiyasına rəsmi müraciət ediblər.
Trend-in məlumatına görə, hər iki klub federasiyaya göndərdikləri məktubda görüşün mövcud tarixdə keçirilməsinin çətin olduğunu bildirib. Onlar sıx oyun təqvimini, qış mövsümündə gözlənilən əlverişsiz hava şəraitini və komandaların fiziki vəziyyətini əsas səbəblər kimi göstəriblər.
Müraciətdə qeyd olunub ki, mövcud şərtlər altında matçın həm idman keyfiyyəti, həm də təhlükəsizlik baxımından istənilən səviyyədə təşkili çətinləşir və buna görə qarşılaşmanın daha uyğun tarixə keçirilməsi məqsədəuyğundur.
Türkiyə Futbol Federasiyasının məsələ ilə bağlı yaxın günlərdə yekun qərar verməsi gözlənilir. Qərardan sonra Superkubok yarımfinalının təqvimində dəyişiklik olub-olmayacağı rəsmiləşəcək.