...

Ağcabədinin içməli su təchizatı və kanalizasiya sistemləri yenidən qurulur (FOTO)

İqtisadiyyat Materials 6 Aprel 2018 20:52 (UTC +04:00)
Ağcabədi şəhərində içməli su təchizatı və kanalizasiya sistemlərinin yenidən qurulması layihəsi çərçivəsində tikinti-quraşdırma işləri davam etdirilir.
Ağcabədinin içməli su təchizatı və kanalizasiya sistemləri yenidən qurulur (FOTO)

Trend-i buradan izləyin

Bakı. Trend:

Ağcabədi şəhərində içməli su təchizatı və kanalizasiya sistemlərinin yenidən qurulması layihəsi çərçivəsində tikinti-quraşdırma işləri davam etdirilir.

“Azərsu” Açıq Səhmdar Cəmiyyətindən Trend-ə verilən məlumata görə, layihənin icra vəziyyəti və gələcəkdə görüləcək işlər Cəmiyyətin, Rayon İcra Hakimiyyətinin rəsmilərinin, podrat təşkilatlarının nümayəndələrinin iştirak etdiyi görüşdə ətraflı müzakirə edilib.

“Azərsu” ASC-nin sədr müavini Etibar Məmmədov layihənin vaxtında və keyfiyyətlə icra olunması üçün bütün qüvvələrin səfərbər olunması, şəhərin əsas küçələrində qazıntı işləri aparılarkən ətraf mühitin qorunması və nəqliyyatın hərəkətinə problem yaradılmaması ilə bağlı tapşırıqlar verib.

“Ağcabədi şəhərinin içməli su təchizatı və kanalizasiya sistemlərinin yenidən qurulması layihəsi” Azərbaycan hökuməti və Asiya İnkişaf Bankının birgə maliyyələşdirdiyi “Su təchizatı və kanalizasiya investisiya proqramı” çərçivəsində həyata keçirilir. Layihə 2035-ci ilədək perspektiv inkişaf nəzərə alınmaqla 45 min nəfərin içməli su və kanalizasiya xidmətlərindən istifadəsinin yaxşılaşdırılmasına hesablanıb.

Layihəyə əsasən, Ağcabədi şəhərini içməli su ilə təmin etmək məqsədi ilə 14 subartezian quyusunun qazılıb,28,7 km uzunluğunda magistral su xəttinin 27,2 km-lik hissəsi tikilib. Ümumi tutumu 10000 kubmetr olan 2 su anbarının tikintisi işləri isə davam etdirilir. Eyni zamanda inşası nəzərdə tutulan Şəhərin içməli su və kanalizasiya şəbəkələrin tikintisi üzrə işlər yekunlaşmaq üzrədir.

Layihədə nəzərdə tutulan 214 km su şəbəkəsinin 186,7 km-lik hissəsində işlər yekunlaşıb. Yeni yaradılmış şəbəkədən abonentlərə ev birləşmələri verilir, sayğaclar quraşdırılır. Ağcabədi şəhərində tullantı sularının idarə edilməsi məqsədilə 205 km kanalizasiya şəbəkəsinin 191 km-i inşa edilib, 4 kanalizasiya-nasos stansiyasından 3-ü quraşdırılıb.

Layihə çərçivəsində Ağcabədi Sukanal İdarəsi üçün müasir tipli inzibati binanın tikintisinə başlanılıb. Su və kanalizasiya şəbəkələrinin tikintisinin 2018-ci ildə başa çatdırılması nəzərdə tutulur. Bununla da şəhər əhalisi 24 saat fasiləsiz və keyfiyyətli içməli su ilə təmin olunacaq.

Şəhərdə yaranacaq tullantı suların zərərsizləşdirilməsi məqsədilə gələcəkdə məhsuldarlığı sutkada 10 min kubmetr olan təmizləyici qurğu tikiləcək.

Qeyd edək ki, Ağcabədi şəhərinin mövcud içməli su təchizatı və kanalizasiya sistemləri 1960-70-ci illərdə yaradılıb. Həmin illərdə tikilmiş sistemlər şəhəri tam əhatə etməməklə yanaşı, istismara yararsız vəziyyətə düşüb.

Məqalədə:
Xəbər lenti

Xəbər lenti