Bakı. Trend:
Maliyyə naziri Samir Şərifov 2023-cü ilin dövlət büdcəsində neftin bir barrelinin orta qiymətinin mövcud qiymətlərdən daha aşağı səviyyədə götürülməsi məsələsinə aydınlıq gətirib.
Trend-in məlumatına görə, S.Şərifov noyabrın 11-də Milli Məclisin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları, Beynəlxalq münasibətlər və parlamentlərarası əlaqələr komitələrinin birgə iclasında “Azərbaycan Respublikasının 2023-cü il dövlət büdcəsi haqqında” qanun layihəsinin müzakirəsi zamanı bildirib ki, hazırda dünya bazarında yüksələn neft qiymətləri kəskin enə də bilər.
“Eniş baş verəndə də problemlər yaranır. Bizim siyasətimiz odur
ki, neft asılılığını ardıcıl sürətdə azaldaq. Hazırda biz dünya
bazarında 90 dollardan yüksək olan qiyməti büdcədə 50 dollar
səviyyəsində nəzərə almışıq.
Bu yanaşma ilə neftin qiymətinin oynamasının mənfi təsirlərindən
özümüzü sığortalayırıq. Hesab edirəm ki, növbəti illərdə də biz bu
siyasəti davam etdirəcəyik. Biz bu məsələdə kifayət qədər ehtiyatlı
olmalıyıq”, - deyə nazir əlavə edib.
Xatırladaq ki, Azərbaycan Respublikasının 2023-cü il dövlət büdcəsi haqqında” qanun layihəsi oktyabrın 24-də Milli Məclisə daxil olub.
Layihədə 2023-cü il üçün dövlət büdcəsinin gəlirləri 30,7 milyard manat proqnozlaşdırılır ki, bu da ölkə tarixinin ən yüksək göstəricisi olmaqla, 2022-ci illə müqayisədə 5,2 faiz, 2021-ci illə müqayisədə isə 16,4 faiz çoxdur.