Bakı. Trend:
Hesablama Palatasının Naxçıvan Muxtar Respublikası üzrə İdarəsi tərəfindən ötən ilin iş planı üzrə başa çatdırılmış auditlərlə uyğunluq elementləri üzrə cəmi 46,6 milyon manat maliyyə pozuntusu aşkarlanıb, bunun 12,7 milyon manatını hesablanmış büdcəyə zərər təşkil edib.
Trend bu barədə “Azərbaycan Respublikası Hesablama Palatasının 2024-cü ildə fəaliyyəti haqqında hesabat”ına istinadən xəbər verir.
Məlumata görə, aşkarlanmış pozuntunun 31,5 milyon manatı bank hesabında saxlanmaqla Naxçıvan Muxtar Respublikasının büdcəsinə köçürülməyən vəsaitdən ibarət olub.
İdarə tərəfindən keçirilmiş auditlərlə maliyyə hesabatları üzrə 19,0 milyon manat məbləğində təhrif aşkarlanıb ki, bunun da 18,3 milyon manatı əhəmiyyətli təhriflərdən ibarət olub.
Yuxarıda qeyd olunan nöqsanlardan əlavə, 2024-cü ilin İş Planına uyğun olaraq İdarə tərəfindən keçirilmiş auditlərlə aşkarlanmış səmərəsiz xərclərin məbləği 2,3 milyon manata bərabər olub.