Bakı. Trend:
Son 5 ildə qeyri-neft-qaz sektoru real olaraq texminen 26%, qeyri-neft-qaz sənayesində yaradılmış əlavə dəyər isə 1,5 dəfə artıb.
Trend xəbər verir ki, bunu “Konstitusiya və Suverenlik” - Azərbaycanda sahibkarlığın inkişafı” mövzusunda keçirilən konfransda iqtisadiyyat nazirinin birinci müavini Elnur Əliyev deyib.
O qeyd edib ki, Azərbaycan iqtisadiyyatı mühüm inkişaf mərhələsinə qədəm qoyub: "Sənaye müəssisələri və bu sahədə fəaliyyət göstərən fərdi sahibkarlar tərəfindən 2025-ci ilin yanvar-mart aylarında 15,8 milyard manatlıq sənaye məhsulu istehsal edilib. Qeyri-neft-qaz sektorunda məhsul istehsalı 3,5% artıb".
"Azərbaycanın strateji valyuta ehtiyatları 73 milyard ABŞ dollarını ötüb. Yüksək valyuta ehtiyatları ölkənin iqtisadi sabitliyini göstərir və bu da yerli və xarici investorlar üçün cəlbedici mühit yaradır. Özəl sektorun ÜDM-də payı 83%, məşğulluqda isə 78%-dən artıqdır", - deyə nazir müavini bildirib.