Azərbaycan, Bakı/ Trend , müxbir A.Bədəlova/ Litva Seyminin (Parlamentinin) xarici işlər daimi komitəsinin sədri Yustonas Karosasın rəhbərlik etdiyi nümayəndə heyəti ilə iqtisadi inkişaf naziri Heydər Babayevin görüşündə Azərbaycan-Litva İqtisadi Əməkdaşlıq Komitəsinin yaradılması perspektivləri müzakirə olunub. Bu barədə Nazirliyin məlumatında göstərilib.
Görüşdə Azərbaycan-Litva iqtisadi əlaqələri və bu əlaqələrin inkişaf perspektivləri, iş adamları arasında əməkdaşlığın genişləndirilməsi məsələləri müzakirə olunub.
Yustonas Karosas Azərbaycan və Litva arasında iqtisadi-ticarət əlaqələrinin arzuolunan səviyyədə olmadığını, ölkələr arasında ticarət əlaqələrinin daha da inkişaf etdirilməsi üçün geniş imkanların mövcudluğunu qeyd edib.