Azərbaycan, Bakı / Trend , müxbir Ü.İsmayılova/ Bazar ertəsi Azərbaycanın Standartlaşdırma, Metrologiya və Patent üzrə Dövlət Agentliyindən verilən məlumata görə, agentlik əmtəələrin keyfiyyətinin yoxlandığı laboratoriyaları yenidən qurur.
Yenidən qurulmuş laboratoriyalar uşaq oyuncaqlarında insan səhhətinə zərərli olan maddələrin müasir və daha dəqiq yolla aşkarlanmasına imkan verəcək.
Çin istehsalı olan oyuncaqlarda insan səhhəti üçün zərərli maddələrin olması son bir neçə ay ərzində aktual mövzulardan biridir.
Dövlət agentliyi uşaq oyuncaqlarında zərərli maddələrin olmasını dünya standartlarına cavab verməyən köhnə avadanlıqla müəyyənləşdirir.
ABŞ-ın uşaq oyuncaqları istehsal edən iri şirkətlərindən biri olan "Mattel Inc" avqust ayında şirkətin Çindəki müəssisələrinin istehsalı olan 18,2 milyon oyuncağı ABŞ, Kanada, Böyük Britaniya və Meksika bazarlarından yığışdırılmasını tələb edib. Səbəb isə, oyuncaqlarda istifadə olunan boyada qurğuşunun artırılması və oyuncaqlara maqnitlərin yerləşdirilməsidir. Rəngi daha da parlaq edən qurğuşun beyində xəstəlik törədə bilər.