Azərbaycan, Bakı, 19 yanvar / Trend , müxbir İ.Xəlilova / Dövlət Statistika Komitəsindən verilən məlumata görə, 2007-ci ildə Azərbaycan iqtisadiyyatına beynəlxalq təşkilatlar və əcnəbi ölkələr tərəfindən yatırılan sərmayənin 94,9 faizi Böyük Britaniya, ABŞ, Yaponiya, Norveç, Türkiyə, Çexiya və İran investorlarının payına düşür.
Sərmayə yatırımının ümumi həcmində ən yüksək xüsusi çəki 42,4 faizlə (1 161,577 mln. manat) Böyük Britaniyanın payına düşür. Lakin 2006-cı ilə nisbətən bü ölkənin investisiyası 17,1 faiz azalıb.
Amerikanın investisiya payı 24,8 faiz artaraq 653,726 mln. manat (xüsusi çəkisi 23,9 faiz), Yaponiya - 13,4 faiz artımla 342,111 mln. manat (12,5 faiz), Norveç - 1,8 faiz artımla 213, 573 mln. manat (7,8 faiz), Türkiyə - 13,2 faiz azalmaqla, 168,587 mln. manat (6,2 faiz), İran - üç dəfə artmaqla 35,625 mln. manat (1,3 faiz) olub.
BMİ-nin ən böyük investisiya yatırımı həcmi üç dəfə artırılaraq xüsusi çəkisi 1,2 faiz, 33,447 mln. Manat olan Avropa Yenidənqurma və İnkişaf Bankının payına düşür. Bu xüsusi çəki ilə Azərbaycanda layihələrin həyata keçirilməsi üçün Dünya Bankı keçən il 50,5 faiz artımla 31,975 mln. manat, Asiya İnkişaf Bankı 18,372 mln.manat (0,7 faiz), İslam İnkişaf Bankı - 7,3 dəfə artımla 13,3 mln. manat (0,5 faiz), Küveyt İqtisadi İnkişaf Bankı - 17,8 dəfə artımla 3,054 mln. manat (0,1 faiz) sərmayə yatırıb.
