Azərbaycan, Bakı, 07 fevral/ " , müxbir İ.Xəlilova/Avropa Komissiyasının 2008-ci il fevralın 4-də Azərbaycanda açılan nümayəndəliyi fəaliyyətinin başlanğıc mərhələsində ölkədə maliyyələşdirilən layihələri idarə etməyəcək. Bu barədə İqtisadi İnkişaf Nazirliyinin İnvestisiya siyasəti şöbəsinin rəisi Əsgər Ələkbərov məlumat verib. O, idarəetməyə il ərzində və ya bir il sonra başlaya bilər.
Ələkbərov Bakıda Avropa Komissiyasının nümayəndəliyinin açılmasını siyasi tərəfdən müsbət addım hesab edir. Belə ki, 10 ildir Azərbaycan bunu gözləyib.
"Təcrübə göstərir ki, ölkədə nümayəndəliyin olması əlaqələri asanlaşdırır və ölkədə baş verənləri Avropa Komissiyasına daha dəqiq çatdırmağa imkan verir. Bu nöqteyi-nəzərdən bu, müsbət faktdır. Digər tərəfdən isə, Avropa Komissiyasının nümayəndəliyi ideal formatda Azərbaycanda maliyyələşdirilən layihələrin idarəsi ilə məşğul olur" - İİN-nin şöbə rəhbəri bildirib.
Bakıda açılan nümayəndəlik hazırkı mərhələdə bunu etməyəcək. Belə ki, Avropa komissiyası 2008-ci ildən büdcə dəstəyinə keçir ki, bu da əməkdaşlığın başqa formatıdır. Bu, artıq texniki yardım layihələri deyil və belə layihələr birbaşa Brüsseldən (AK-nin baş ofisi) idarə ediləcək. Nümayəndəlik 2006-cı il üçün TACİS fəaliyyət planının ümumi büdcəsi 19 mln. avro olan yalnız axırıncı beş layihəsini idarə edə biləcək. İlin ortalarından onların reallaşdırılmasına başlanılacaq və iki il ərzində davam etdiriləcək.
Bura investisiya iqliminin yaxşılaşdırılması və ixracın inkişafına dəstək (dəyəri 3 mln. avro), İqtisadi İnkişaf Nazirliyinin institutsional inkişafı (3 mln. avro), texniki peşə təhsili sisteminin inkişafı (3 mln. avro), tvininq-proqramların hazırlanması (6,5 mln. avro) və Aİ və Azərbaycan arasında tərəfdaşlıq və əməkdaşlıq haqqında Sazişin (PCA) reallaşdırılmasına dəstək (3,5 mln. avro) layihələri daxildir.
Avorpa İttifaqı tərəfindən 2007-ci il üçün fəaliyyət planı üzrə reallaşdırılan və dəyəri 19 mln. olan layihələr üçün vəsaitlər Avropa Qonşuluq Siyasəti (ENP) çərçivəsində dövlət büdcəsinə köçürüləcək.
"Bizim Avropa Komissiyası ilə gələcək danışıqlarımızda yeganə predmet - onların qoyduqları şərtlərin yerinə yetirilməsidir" - Ələkbərov bildirib.
