Azərbaycan, Bakı, 19 fevral / Trend / Bakı-Əmman marşrutu üzrə birbaşa hava əlaqəsinin açılması üzrə texniki məsələləri AZAL DK ilə müzakirə etmək üçün İordaniyanın "Royal Jordan" Milli Aviaşirkətinin nümayəndələri Bakıya gəliblər. Bu barədə Azərbaycanın İordaniya və İraqdakı səfiri Elman Arazlı məlumat verib.
Yeni reysin açılması aprelin əvvəlində gözlənilir. Birinci mərhələdə uçuşlar həftədə iki dəfə həyata keçiriləcək. "Əgər bu, mənfəətli olarsa, tərəflər reyslərin sayının artırılması məsələsini müzakirə edəcəklər" - deyə Arazlı bildirib.
İlkin olaraq uçuşlar "Royal Jordan" təyyarələri, əlavə reyslər isə Azərbaycanın AZAL Milli Aviasiya Şirkətinə məxsus təyyarələrlə həyata keçiriləcək.