Azərbaycan, Bakı, 18 aprel / Trend , müxbir İ.Xəlilova/ Azərbaycan hökuməti fəaliyyətdə olan yardım strategiyası çərçivəsində Dünya Bankından (DB) təxminən 1,2 mlrd. dollar həcmində əlavə maliyyələşmənin alınmasına razılıq verib, DB-nin Bakı nümayəndəliyindən məlumat verilib. Bankın Direktorlar Şurası mayın 27-də bərpa olunmuş strategiyanı həyata keçirməyə hazırlaşır. Bu vəsaitləri Azərbaycan 2009-2010-cu maliyyə ilində əldə edə biləcək, lakin bu, Azərbaycanı vəsaiti bütövlükdə mənimsəməyə məcbur etmir.
Bu vəsaitlərin əldə edilməsi nəticəsində strategiya çərçivəsində maliyyələşmənin ümumi həcmi 2,5 mlrd. dollar artacaq.
Əlavə vəsaitlərin ayrılması məcburiyyəti strategiyanın reallaşdırılmasında ötən iki il ərzində vəsaitlərin vaxtından qabaq istifadəsi ilə əlaqədar olub. Bank 14 layihənin maliyyələşdirilməsinə dörd il müddətinə nəzərdə tutulmuş təxminən 1,26 mlrd. dollar vəsait ayırıb.
Yaxın iki il ərzində yeni layihələrdən ibarət cədvəl hazırlanacaq. Güman edilir ki, DB-nin kredit ehtiyatları nəqliyyat infrastrukturu, su təchizatı və kanalizasiya ilə bağlı işlərə, ekoloji proqramın ikinci mərhələsinə, ali təhsilin təkmilləşdirilməsi və dövlət idarələrinə cəlb olunacaq.
Əlavə maliyyələşmə çərçivəsində ölkə yalnız Beynəlxalq Yenidənqurma və İnkişaf Bankının ehtiyatlarına çıxışı əldə edəcək, belə ki, güzəştli maliyyələşmə üzrə 131 mln. dollar olan son kvotanı Azərbaycan 2008-ci maliyyə ilində istifadə edə biləcək.
Güzəştli maliyyələşməyə məcburi köçkünlərin sosial vəziyyətinin yaxşılaşdırılması, kənd təsərrüfatı sərmayələri, maliyyə sektorunun müasirləşdirilməsi, korporativ və dövlət sektorunda hesabat (CASPAR), təhsil sistemində islahatlar və sosial təminat üzrə layihələr daxildir.
Qalan altı layihə (dəmiryolu vasitəsilə ticarət və nəqliyyatın inkişafı, avtomagistralların və ətraf yolların yenidən qurulması, su təchizatının yaxşılaşdırılması, ətraf mühitin təmizlənməsi) BYİB xətti üzrə maliyyələşdiriləcək. Baxmayaraq ki, su təchizatı ilə bağlı layihəyə qismən BİA xətti ilə vəsaitlər ayrılıb.
Müəlliflə əlaqə saxlamaq üçün elektron ünvan: [email protected]